MNF MLA-te insawifiahna Lunglei ZPM-in nuihzatthlak an ti

ZPM Southern Headquarters, Lunglei chuan thuchhuah siamin, MNF party MLA 12-te'n ZPM Legislature Party (ZLP) leader Lalduhoma, MLA aṭanga a bàn theihna atana hma an laknaah, a hêktu MNF MLA-te an insawifiah chiam chu nuihzatthlak an tih thu an tarlang.

Lunglei ZPM chuan, MNF MLA-te'n October 8, Ninganiah press conference neiin, Assembly Speaker hnena ZLP leader Lalduhoma an hêkna chu amah huat vang ni loin, dan an ngaih pawimawh vang zawk nia an sawi chu mipuia hmai phihna a nih thu an tarlang a, "Tlânchhe chunga press mite hmachhawn an ni zawk. A héktu zawk an insawifiah chiam leh CM hriatpui loha thil ti nia an insawi khan mipui nuih an tiza hle a ni," an ti.

MNF MLA-te insawifiah chu Lalduhoma'n ziaka insawifiahna Speaker hnena a thehluh ní taka boruak dang siam tumna a nih thu sawiin Lunglei ZPM chuan, "Mipui thlàwpna a pawimawh tih hriain Pu Lalduhoma hi mipui demtir a, a dik lo ngei anga sawi a, mipui bum tuma an sawi ngai an sawi nawn leh kher hi mi â ber tan pawh a hriatthiam theih vek a ni," an ti a; Lalduhoma chuan Speaker-in hun a pekah insawifiahna a thehlut mai tih an sawi.

ZPM Southern Hqrs. chuan, Lalduhoma hêktu MNF MLA 12 zingah kohhran upate pawh an awm tih sawiin, "Hetiang taka Assembly House chhunga an ṭhutpui an bei vak mai hi Kristianna aṭanga thlirin a mak a, Mizo tlawmngaihna kawnga thlir phei chuan a zahthlak tak zet a ni," an ti bawk.