DMR Minister-in lei tlahniam a enfiah

Disaster Mangement & Rehabilitation (DMR) minister Lalchamliana chuan nimin khan Hunthar Veng, Chanmari West leh Vaivakawn inrina báwr vela lei tlahniam tharte a hmunah a tlawh a, hmalak dan tur a enfiah.

Lalchamliana chuan, Hunthar Veng huam chhunga NH-54 lei tlahniam a endik a, lei tlahniam dâwlna atana Mizoram state sum cheng nuai 500 chuang sénga PWD (Highway) hna thawh mek chungchang engineer-te a sawipui. Hna thawktute chu theihtawp chhuah tur te, ṭha tak leh rang zawka thawk turin a hrilh.

Vaivakawn aṭanga Chanmari West panna kawng tlahniamte a enfiahnaah, thawm ṭhat hna thawktu PWD-te hmalak zel dan tur a sawipui a; lei tlahniam leh tawlh vênna atana geologist-te thurâwn a sawipui bawk.

DMR Minister chuan, mipui harsatna tawh chu Chief Minister pawhin a hriat thu sawiin, "Lei tlahniam vanga in leh hmunhma chánte ka tawrhpui tak zet. NDMA aṭangin mithiam pahnih October 26, 2020 hian he lai hmun en tur hian an rawn kal dawn. Sorkar hmalakna turahte khawtlang thlàwpna kan mamawh zel dawn a ni," a ti.

DMR Minister hi Aizawl West-II bialtu MLA Lalruatkima, minister of state, Aizawl North-III bialtu MLA C Lalmuanpuia leh sorkar official-te'n an ṭawiawm a ni.