KHAWTHLIR

October 9-15, 2020 chhungin India ram pumah 'Celebration of National Postal Week & Citizens Duties Awareness Programme' hman a ni dawn. He hapta chhung hian Ministry of Communications hnuaia Department of Posts chuan khua leh tuite chu India Danpuia Preamble chhunga Danpuiin khua leh tui tana tihhlawhtlin a tumte leh khua leh tuite mawhphurhna - Fundamental Duties-te hre thar leh bèl chiang leh ṭheuh turin mipui chah an ni.

Hrangbana College chuan nimin khan zirlai tharte lawmna leh magazine tlangzarhna hun an Golden Hall-ah an hmang a; khuallian Higher & Technical Education minister Dr R Lalthangliana chuan, tih tak takna, tumruhna leh taimakna chu khawvel hneh theihna tura thil pawimawh a nih thu a sawi. HBC hian kuminah zirlai lut thar (1st semester) 810 an nei.

State Referral Hospital (ZMC)-ah nimin khan Covid-19 vei dah luh an awm lo a, enkawl mek zingah hripui vei tawh lo pakhat chhuahtir a ni thung. SRH-ZMC Bulletin tarlan danin, SRH-ah hian Covid-19 vei vangin mi pasarih enkawl mek an ni a, an zinga pakhat chu ICU-ah enkawl a awm a; ngaihtuahawm lutuk an awm lo.

Mizoram State Commission for Protection of Child Rights (MSCPCR) chuan, Mizoram sorkarin Covid-19 vei naupangte enkawl dan tur inkaihhruaina a tichhuak ta chu lawmawm an tih thu an tarlang. Covid-19 vei naupang, nu leh pa leh chhungte tel loa la khawsa hrang rual lote chu an chhungte'n an awmpui theih nan ruahmanna siam turin MSCPCR chairperson Sangzuali Vanchhawng-in September 2020 khan Health Secretary hnenah ngenna a thlen a ni.

Hnahthial Town Cleanliness Week & Cleanliness Competition Committee chuan nimin khan Faina Hnatlangpui an huaihawt. Hna­tlangah hian Hnahthial khawpuia veng hrang hrang zirna-in leh pisate an tifai a; tuihâwk luankawr leh vantlang hmun pawimawh hrang hrang an thianfai bawk.