Sumdawnna lirtheite an nuar ṭan Aizawlah sorkar bus 31 tlantir

Commercial Vehicle Joint Action Committee (CVJAC) chuan nimin aṭang khan sorkara lungawi lohna an lantir a, zing dar 5 aṭangin tiam chin awm loin sumdawnna lirthei zawng zawng an tlan lo a, sorkar aṭanga thu lawmawm an hmuh hma chuan tlân loh chhunzawm zel an tum. Hetih lai hian, sorkar chuan nimin khan Aizawlah sorkar motor 19 a tlantir.

Vanglaini palai zawhna chhangin CVJAC hruaitute chuan, lungawi lohna an lantir chungchangah sorkar thuneitute'n an la be pawp lo tih sawiin, "Sorkarin inbiak an duh a nih pawhin, lungawi lohna lantir hi tihtawp nghal kan tum lo. Lungawi lohna kan lantir hmasak khan inbiak hmain kan lungawi loh lantirna kan titawp a, kan inbe rem leh si lo a, inhûi khawm a har tawh," an ti a; an duh ang sorkar aṭanga an hriat hma chuan lungawi lohna lantir zel an tum.

Ziak ngeiin an duh anga tihhlawhtlin a ni tih hriattir an duh tih sawiin CVJAC hruaitute chuan, "Ziak ngeia thil tih a nih loh chuan a hnuah harsatna a awm lehin a buaithlak a ni," a ti.

Sumdawnna lirthei an tlân leh tlân loh vilin hmun hrang hrangah lirthei neitu leh khalhtute an duty a, buaina lian tham chhuak a awm lo. Mi ṭhenkhatin number plate eng (yellow) bel ve tho MST bus tlantir a ni chu an ngaimawh deuh a, mahse CVJAC hruaitute chuan MST bus chu sorkar ta, chhiah pawh sorkara chhûng lut an nih avangin ngaimawh lo turin an member-te an hrilh.

CVJAC-in lungawi lohna an lantir avang hian Mizoram chhung bakah, Mizoram pawn aṭangin lirthei rawn lut a awm loa, Mizoram chhuahsan tur lirtheite chu Kolasib-ah dan an ni.

Sumdawnna lirthei tlân lo tura tih hian emergency thil, bawnghnute phur, medical duty turte a huam lo a; innei, lungphun, chhiattawhna leh ṭul bikah chuan phalna lak theih a ni thung.

Transport director R Remmawia'n Vanglaini palai zawhna chhanga a sawi danin, sumdawnna lirtheite an tlan loh avang hian mipui harsatna zualpui phuhrûk turin nimin khan Aizawlah sorkar department bus 31 tlantir a ni a, chungte chu MST bus 17 leh department dang bus 14 an ni. Thingtlang lama tlân mek MST bus-te erawh chu khawpui chhunga tlan tura pawh a ni lo.

Bus 31 zinga 29 chu khawpui chhung tlangdungah an tlân a, bus pahnih chu Mualpui leh Ramrikawn lamah tlantir an ni. Bus tinah hian venhimna hna thawk turin police pahnih zel duty tir an ni a; R Remmawia chuan, "Police hotute hnenah escort duty pe turin kan dil a, kan dil angin bus pakhatah police pahnih zel min pe a ni," a ti.

Transport minister John Rotluangliana chuan Vanglaini zawhna chhangin, CVJAC thil phut chungchangah sorkarin a tih theih ang chu a tih tawh thu a sawi a, "A bak chu tih vak theih a awm rih lo," a ti a; CVJAC hruaitute nen inbiakna lam hawia hmalakna a awm rih loh thu a sawi.

CVJAC phût leh lungawi lohnate

4 Replacement-in motor a tihtam phah lo chunga replacement phal a ni lo chu an duh lo. Hei hi inthlan hmaa party manifesto-ah telh a ni loin an hria.

4 All Mizoram Permit tihtawp an duh lo.

4 Intlân chhâwk chungchangah an hmakhua tur chu anmahni rèl fel an duh.

4 Auto-rickshaw kawngkhâr dinglam pin an duh lo.

4 Special permit kalpui dan chu awmze nei lo leh ṭul loah an ngai.

4 Aizawl by-pass road, Bawngkawna motor lian No Entry awm hlih an phût.

4 Tax sang taka an chawi avangin rate siamṭhat vat an phût.

4 Maxicab service-te motor hlui tawh thlak theih leh route bik pawn lama tlan phal lohna sût an phût.

4 Permit thar pek tawh loh an phût.

4 Truck-te chhiah chawi Rs. 2,900 aṭanga Rs. 7,500-a tihsan an duh lo.