Lawngtlaia naute leh a nu an thih dana thu thehdarhah dik lo a awm - Lal Thanzara

Mizoram Government Nursing Service Asso-ciation (MGNSA) chuan, nimin khan Aizawl Civil Hospital conference hall-ah Biennial General Conference vawi 19-na an hmang. Khuallian Lal Thanzara, Health minister chuan, May 1, 2016-a Lawngtlai District Hospital-a naute piang leh a hringtu nu an thih thu social media-a thu thehdarhte chu a dik vek lo a, thu dik lo thehdarh a awm thu a sawi.

Health Minister chuan, tun hnaiah Health department-in hming-chhiatna leh sawi-selna an tawh thu sawiin, "A pawi a, a vanduaithlak hle a ni... Lawngtlaia thil thleng chungchangah report dik lo a awm a, chanchinbuahte vawrh darh a ni a, a pawi hle. Mahse, an vawrhdarh ang kha a ni lo," a ti.

Tun hnaia sawiselna an tawhte chu hnual phah nana hmang lo tura chahin, Lal Thanzara chuan, "Ṭhahnemngai lehzuala kan thawh a ngai. Sawiselna tawng
ṭhin mah ila, theihtawpin ṭan kan la mek," a ti a; sorkar ṭanlakna vangin Lawngtlai district leh Saiha district-ah nausen thihna a tlakhniam thu a sawi.

Lal Thanzara chuan, Mizoram hmun hrang hrangah nurse-te an indaih lo tih sorkarin a hriat thu a sawi rualin, thawktu lak belh zung zung theih a ni lo tih a sawi a, "Kawng hrang hrangah kan indaih lo a, sum harsatna vangin vawi leh khata chinfel duak theih a ni lo," a ti. MPSC kaltlangin nurse 25 lak thar tum a nih thu sawiin, "MPSC-in advertisement pawh an chhuah tawh. A dang pawh lak zel tum a ni," a ti.

Damlo enkawl hna chu Isua ngaih pawimawh a ni tih sawiin, Thanzara chuan, "Isua hnathawh chhunzawmna a ni a, hna zahawm, Pathian rawngbawlna a ni," a ti. Nurse-te chu damlote taksa damna chauh ni loin, an rilru leh thlarau damna atan puitu nih tum turin a fuih a; an ṭawngkamin damlote damna leh dam lohna te, Health depart-mnent hmingṭhat leh hmingchhiatte a thlen theih thu a sawi.

Health Minister chuan, nurse-te chu Mizo-ramin state páwna a thawn chhuah zinga ṭha berte an nih thu sawiin, "India ram chhung leh ram páwnah Mizo nurse ṭhahnem tak an thawk mek a, Pathian rawngbawlna lamah pawh a thawh hlâwk ber berte in ni," a ti a; thawn chhuah tlak (export quality) ni zel turin a fuih a ni.

MGNSA inkhawm-puiah hian Health prin-cipal director Dr K Ropari pawhin thu a sawi a; an member thite sunna hun an hman bakah, an member pension-a chhuak mi 20-te hnenah ngaihhruina an hlan. Chawhnu lamah report ngaihthlak a ni a; vawiinah chhunzawm leh tur niin, rorel inkhawm neih a ni ang.

Report-a a lan danin, sorkar hnuaiah nurse a ngheta thawk, contract leh programme hnuaia thawk mi 850 vel an awm mek a ni.