Rangkachak rûkbo thubuai Col Jasjit Singh jail-ah khung Court-in CS Thanga anticipatory bail a pe

Rangkachak tawlhrûk suam thubuaia hming lang, CS Thanga, Kanan Veng, Aizawl chu May 17, 2016 khan Court-in anticipatory bail a pe.

He thubuaia inhnamhnawiha puh 39 Assam Rifles commandant Col. Jasjit Singh chu nimin khan jail-ah khung a ni.

CS Thanga hian May 3, 2016 khan anticipatory bail a dil a, Court chuan interim bail a pe. Thawhlehni khan anticipatory bail a dilna chu ngaihtuah leh a ni a, District & Session judge Lucy Lalrinthari'n a phalsak.

Hetih lai hian, CS Thanga hian rangkachak man tur a awm thu 39 AR commandant Col. Jasjit Singh a hrilh thu a sawi a; Jasjit Singh erawh chuan silai man tur a awm thu bak a hrilh lo niin a sawi thung.

Police aṭanga thu dawn danin, CS Thanga hian police-te a thawhpui ṭha hle a, koh a nih apiangin a kal ṭhin. CS Thanga chuan, Lalmuanawma Mathipi ten rangkachak chanchin an hrilh hnuah, Col. Jasjit Singh chu duhsakin, an man chuan a hmingṭhat phah thei dawna a hriat avangin rangkachak chu man turin a hrilh tih police-te a hrilh.

CS Thanga'n police-te a hrilh danin, rangkachak phurtu motor number, Lalmuanawma Mathipi ten an pek pawh Col. Jasjit Singh hnenah a hlan a, rangkachak man a nih hnuah an kalpui dan a hriatpui lo.

Police-in thu zawhfiah atana an kawl mek Col. Jasjit Singh erawh chuan, rangkachak man tur ni loin, silai tawlhrûk man tur a awm tih CS Thanga'n a hrilh niin police hnenah a sawi a; rangkachak phurhna lirthei number CS Thanga'n a pe nia a sawi chu a hriat loh thu a sawi thung.

Hetih lai hian, CS Thanga leh Lal-muan-awma Mathipi te thusawi chu a inmil deuh zel niin thu dawnna chuan a sawi.

Col. Jasjit Singh chu nimin khan Court-ah hruai leh a ni a; police kutah ni 13 chhung a awm tawh avangin Court chuan jail-a awm turin (judicial custody) a ti. Dan ang chuan police-te hian an mi mante ni 14 chhung an kawl thei a ni.

Hetih lai hian, motor gear box aṭanga rangkachak la chhuaktu tak nia sawi, Joseph Lalrosiama chu jail-a police-te'n thu an zawhfiahnaah mawi lo takin an ti ṭhin niin a ukil, C Lalfakzuala chuan a sawi a; hei vang hian Court chuan Jail Superintendent chu Joseph Lalrosiama hriselna dinhmun Court-a pe turin a hriattir.