KHAWTHLIR

V/C inthlan

Aizawl district-a khaw 25 leh Kolasib district-a khaw parukah vawiin hian V/C thlan a ni dawn. Inthlanah hian zing dar 7 aṭanga tlai dar 4 thleng vote thlak theih a ni dawn a, vote thlak zawh veleh vote tlate chhiar nghal a ni ang. Aizawl district-a khaw 25-ah vote nei mi 15,743 an awm a, Kolasib district-a khaw parukah vote nei 4,493 an awm.

Hospital report

April 2016 chhung khan Aizawl Civil Hospital-ah OPD leh Casualty-ah mi 34,824 an inentir a, mi 1,206 admit an ni. Nau piang 335 leh mithi 52 an awm a; Mizoram páwna damlo thawn 185 an awm bawk.

Hmalakna thlirlet

Champhai District Consultative Committee/District Level Review Committee chu May 17, 2016 tlai khan Champhai additional DC C Lalzarliana hoin DC conference hall-ah an ṭhukhawm a, bank hmalakna hrang hrang an thlirlet.

Late fee tel loin Chhiah pek theih

Transport department chuan, lirthei chhiah pe lote tan pek tlai man (late fee) tel loa pek theih hun an hawng a, nimin khan an kalpui ṭan. Transport director R Remmawia hnen aṭanga thu dawn danin, late fee tel loa chhiah pek theih hun hi nimin aṭanga thla thum chhung kalpui tur a ni.

Ganja man

Excise & Narcotics department-a Anti Narcotics Squad-te chuan, May 17, 2016 tlai dar 4 vel khan Tuikhurhlu-ah ganja kg. 48 leh a neitua puh - Lalsangpuii (50) d/o Liansanga (L), Zemabawk nia insawi leh Khamkhanthang (50) s/o Tunkhengpau (L), Selbung, Myanmar nia insawite an man.

Leiminin delh

Nimin zing dar 4 vel khan Vairengte Presbyterian kohhran pastor quarters thar sakna lungrem chu a chim a, a thlanga chenna in leh Maruti car a delh chhia. Nimin zing vêk khan Rangvamuala leimin ṭhinah lei a min leh a, kawngpui a hnawh. Leimin hi nimin chhun khan lirthei kal-tlang theiha thenfai a ni.