NIT nawr chak turin ZNP-in sorkar an phût

ZNP chuan National Institute of Technology (NIT), Mizoram hmun tur, Lengpuia mi chu tihpuitlin nan chak zawka hna thawh a nih theih nana hma la turin Mizoram sorkar an phût. NIT-Mizoram campus hmun nghet tur hi acre 190.35 (sq.m. 770319.12)-a zau a ni.

ZNP chuan May 17, 2016 khan Lengpui rama NIT-Mizo-ram campus hmun tur chu tlawhin, hna thawh mekte an enfiah a; "Hna thawh mek hi December 2014-ah ṭan niin, a hmun tur laih zâwl (leveling) leh fencing bakah, a panna kawngpuite thawh mek a ni a. Tuna a lan dan chuan, Tantia Construction-in approach road an siam hi a zím hle a, motor inpelhna tur pawh hmun rem zau lai zawn a ngai hial a ni," an ti.

ZNP chuan, NIT-Mizoram campus tur buatsaih mek chu Central sorkar project ni mah se, a chhawrtu tur Mizote an nih avang leh Mizo hmel lanna tur a nih avangin Mizoram sorkar chu kut kuangkuah mai lo a, kawng engkimah intitatu taka inrawlh turin an duh tih an sawi a; "Kan ram leh hnam rohlu tur a nih ang ngeia a bul aṭanga vil ṭha turin Mizoram sorkar chu thurâwn kan pe a ni," tiin, estimate ennawn ngai loa hun tiam chhunga zawh ni se an duh thu an sawi.

NIT-Mizoram hian a nih tur ang a la nih loh avangin zirnain a tuar hle tih sawiin, ZNP chuan, "Kum 2015 khan India ram puma NIT 30-te tehna pakhatah 26-na a ni," an ti.

NIT-Mizoram hi kum 2010-ah din niin, India rama NIT 30 zinga pakhat a ni a, sorkar laipuia Human Resources Development Ministry din a ni. Tunah hian Chaltlangah Administrative Block pakhat leh Academic Block pali awmin, Tanhrilah hostel pathum leh Zemabawkah hostel pakhat a awm.