RD Minister hoin PMKSY hnathawh thlirho

Rural Development department chuan nimin khan an directorate conference hall-ah Pradhan Mantri Krishi Sinchayee Yojana (PMKSY) hnuaia hmalakna leh hnathawh hrang hrangte an thlirlet a, RD minister R Lalzirliana'n a hmanpui.

R Lalzirliana chuan, loneitute an hnaah an tui rualin, thiamna leh zirna sang zawk neite'n an kaihhruai a ṭul tih a sawi a, "Record vawn ṭhat leh document neih
ṭhat a pawimawh rualin, kut hnathawktuten a tak taka an chhawr theih tura hna thawh a pawimawh zawk. PMKSY hnuaia sum hman tur sorkar laipui aṭanga lo kal chu thiam tak leh fing taka kan hman chuan thingtlang mite tan thil ropui tak kan thawk thei dawn a ni," a ti.

Parliamentary secretary (RD) Lt.Col. ZS Zuala chuan, state ṭhenkhatah chuan khawkhéng vangin thlai leh buhte'n tui duhkhawp an hmu lo tih sawiin, "Ruahtui malsawmna dawngtu Mizoram hian ṭangkai taka kan hman theih a pawimawh," a ti a; PMKSY buaipuitute chu an mawhphurhna sanzia hria a, theihtawp chhuah turin a chah.

PMKSY hi scheme kal mek pali - Accelerated Irrigation Benefit Programme (AIBP), River Development and Ganga Rejuvenation (RDGR), Integrated Watershed Management Programme (IWMP) leh On Farm Water Management (OFWM) kaihkawp a ni.

Scheme-in a tuam chin project-ah ram buâ leh leilung luang ral tur ven leh humhalh bakah tuihna humhalh hna thawh a nih bakah, project-in a huam khuaa mite zingah mi chhumchhia leh hmeithai, eizawnna mumal nei lote tan eizawnna ruahman sakin self help group (SHG) hmangin bul a ṭanpui ṭhin.