Sumdawnna lirtheite lungawi lohna lantir MNF-in âwm an ti; Congress-in an dem

MNF party chuan, Commercial Vehicle Joint Action Committee (CVJAC)-te thil phût leh lungawi lohna an lantir chu âwm an tihpui thu tarlangin, an thil phûtte chu tihhlawhtlinsak turin sorkar an phût. Congress party erawh chuan CVJAC-in lungawi lohna an lantir chu demawm an tih thu an tarlang.

MNF chuan thuchhuah siamin, CVJAC-in nimin aṭanga Mizoram puma tiam chin awm loa sumdawnna lirthei zawng zawng huapa nawrh an huaihawt chu âwm an tihpui thu a tarlang a, "CVJAC-in an thil ngiat hrang hrangte ngun taka ngaihtuahin, mipui tan pawh thil ṭha zawkah kan ngai a, mipuiin harsatna nasa zawk a thlen hmain an thil ngiat hi sorkarin tihhlawhtlinsak thuai se kan duh," a ti.

CVJAC-te chuan zâidawh takin an harsatnate sorkarah an thlen ṭhin nia sawiin, MNF chuan, "Chuti chunga sorkarin an thil phûtte tihlawhtling turin a ngaihsak ṭha tâwk lo," an ti a; chhungkaw tam takin eizawnna atana an hman lirtheia eizawngte dinhmun chu sorkarin a bengkhawn ṭha duh lo nia sawiin, an dem thu an sawi.

MNF chuan, Mizoram sorkarin sum leh paia harsatna nasa tak a tawh sutkian nan kawng hrang hrangin uchuak takin chhiah a tisang mek nia sawiin, "Lifetime tax kum 15 atana lak lâwk a nite hi a uchuak hleah kan ngai a, road tax 6% lak lâwk pawh hi a sang kan ti a, siamṭha thuai turin sorkar kan phût bawk," an ti.

Congress party pawhin thuchhuah siamin, CVJAC-in tiam chin awm loa nawrh an huaihawt chu pawi an tih thu leh an dem thu an tarlang a; "Mizoram sorkar leh Transport Minister-in a theih anga an thil phûtte tihhlawhtlin tuma hma an la chung pawha mipui náwlpui harsatna siam zawnga nawrhna an kalpui hi hriatthiam har kan ti hle," an ti.

MPCC chuan, MCVJAC-te thil phût chu anmahni hamṭhatna ringawt ûmna nia sawiin, "City bus chuan man tihsan an nawrte hi mirethei zawkte rahbehna a ni," an ti a; mahni hmasial vanga mipui tan harsatna an siam chu mipuiin an dem a ngai hlea an hriat thu an sawi.

Congress party chuan, all Mizoram permit tihtawp chu sorkarin hriatthiamna zau tak neiin, mahni khua pêla tlan chhuak duh tan special permit a dil theih tih sawiin, "Emergency leh zan thila chhuah ngaite pawh ngaihhnatthiam an ni," an ti a; auto-rickshaw kawngkhâr dinglam hawn theih loha tihna order chhuak tawh mah se, a ti lote lakah hriatthiamna thui tak sorkarin a nei niin an sawi. "Lifetime tax chungchangah, instalment-a pek theih dan a ngaihtuah mek," an ti bawk.