Sorkar atanga hmuh ringawt tum hi sim a hun tawh: Lal Thanhawla

20th May, 2016

Mizoram Taxation Service Association (MITSA) chuan nimin khan Hotel Regency-ah General Meeting vawi 10-na leh 'Digital signature in modern taxation' tih thupui zirhona an hmang. Khuallian, chief minister Lal Thanhawla chuan, Mizote'n sorkar atanga hmuh belh ringawt kan tum chu sim a duh thu a sawi a, chhiah chawi tam ila sorkar neitu nihna kan nei thei zawkin a ring.

Chief Minister chuan, chhiah cháwi tam apiang ram changkang an ni ṭhin tih sawiin, "Mizote pawh hian chhiah chawi tam ila, sorkarah neitu leh mawhphurtu nihna rilru kan pu thei zawkin ka ring. Sorkara thawh neih ve aia sorkar aṭanga hmuh ringawt kan tum ṭhin hi sim a hun tawh hle a ni," a ti.

Ram ṭhan nan sum lak luhna neih ṭhat a pawimawh thu sawiin, Lal Thanhawla chuan, "Mizoramin resource kan ngah loh avangin chhiah tling khawma kan innghah a ngai a, duh angin hmasawnna hna a thawh chak theih loh a ni," a ti. Mipui harsatna thlen si loa chhiah lakna hnár
ṭha zawn thiam a pawimawh thu sawiin, Taxation department officer-te pawh ngaihtuahna sêng turin a chah.

CM Lal Thanhawla chuan, nawrh chíngte chu neitu nihna rilru pu lo an ni ṭhin nia sawiin, "Kan thil nawr hi mahni tan chauh nge, ram leh hnam tan tih ngun taka ngaihtuah a ṭul," a ti a; sumdawnna lirthei pawl (CVJAC)-te nen an inkawmnaah an harsatna hriatthiampuiin hmalakpui a intiam niin a sawi.

Lifetime tax kum 15 atana lak nghal chu sorkar laipui thuchhuak nia sawiin, CVJAC-te chu complaint ziahsak leh instalment-a pek dan ngaih-tuahpui a inhuam thu a hrilh tawh tih a sawi a; auto-rickshaw kawngkhâr dinglam hawn theih loha siam chu mipui himna tura tih a ni chunga an duh loh tlat chu ṭha a tih loh thu leh, Congress party sorkar hnuah duhsak zawng hnena taxi leh bus permit pek a awm loh thu a sawi bawk.

Taxation secretary Lalropara pawhin thu sawiin, Taxation officer-te chu sorkara chhiah chhûng lut turte’n an dàwr ber tur an nih avangin hmél leh nungchang zahawm tak an put reng a ṭul thu a sawi. Commissioner of Taxes K Sanglawma'n an department hmalakna tlangpui a sawi thung.

Report-a a lan danin, sorkar kum liam ta 2915-16 chhung khan cheng vbc. 249.76 an hmu a; Mizoramin State Own Tax Revenue-a sum a thawh chhuah zawng zawng aṭanga 79% chu Taxation department kaltlanga thawh chhuah a ni.