Anthurium Festival tihtawp a ni - Tourism Minister

Minister Lalrinpuii chuan nimin khan ZPM pisaa inkhawmah thu sawiin, universal health care scheme an buaipui mek thu leh Anthurium Festival tihtawp a nih thu a sawi.

Tourism Minister chuan, kût pahnih - Winter Festival leh Anthurium Festival atan sorkar laipui aṭangin sum hmuh ṭhin a nih thu sawiin, "Anthurium Festival hi mipuiin an ngaihlu tâwk lo nia kan hriat avangin tihtawp a ni a, a aiah Lungleiah Leitlangpui Music Festival nei tura hmalak mek a ni," a ti.

Health minister Lalrinpuii chuan, health care scheme chu zir chian ngai tak a nih avangin uluk takin vawi tam official-te nen an sawiho tawh tih a sawi a, "Tunah hian mipui huapzo universal health care scheme a taka kalpui a nih theih nan hma kan la mek," a ti a; health care scheme tharah Rs 5,00,000 thleng pawisa pek ngai loin damdawi-inah inenkawl theih a ni dawn tih a sawi.

Health Minister chuan, "Ruang phurh chungchangah, budget-ah cheng nuai 500 kan dah tawh a, hei hi cabinet meeting hmasa berah min pawmpui turin kan peih tawh," a ti a; ruang phurhna senso chu MLA-te buaina ṭhin a nih thu a sawi.

Lalrinpuii chuan, tar pension Rs 1,000-ah tihpun a nih bakah, upa leh rualbanlote tan Civil Hospital-ah counter hranpa siam a nih thu te, an tan bik card eng siam a nih thu leh, rualbanlote tan awlsam zawka office dawr theihna buaipui mek nih thu a sawi.

ZPM chu kalphung thar mipui sorkar a nih ang leh Chief Minister-in a puan tawh angin Year of Consolidation kalpui mek a nih thu sawiin Lalrinpui chuan, "Kan manisfesto tihlawhtling tur chuan kan kutke ber sorkar hnathawkte kan policy nen inrem tura kan hrilhfiah a ngai hle. Plan dik tak duan hmasak a, inbuatsaihna ṭha nen hma kan lak a ngai," a ti bawk.