Special Court-in LSC lem siamtu leh zangnadawmna late hremna a puang

Kum 2007 vela India leh Bangladesh ramri hungna tura ram lâkah ram pass (LSC) lem hmanga zangnadawmna latu leh thil dik lo tihnaa inhnamhnawih mi 23-te chu Special Court (Prevention of Corruption Act) chuan lung-ina táng tur leh pawisa chawi turin a hrem.

Ram pass lem siamna leh pass lem hmanga zangnadawmna latute chu Special Court (PC Act)-a judge Dr HTC Lalrinchhana chuan May 17, 2024 khan thiam loh a chantir tawh a, nimin khan hrem dan tur a puang. Hrem dan tur puanna (sentence hearing)-ah hian thiam loh chantirte chu court-ah an inlan.

Thil dik lo tihnaa a meizang hlaptu ber Ranga Mohan Chakma s/o Kinachand Chakma, Kamalanagar-II, Lawngtlai district chu ram pass dik lo zawng zawng pe chhuaktu a nih avangin hrem nat ber a ni a; kum li chhung táng tur leh Rs 3,00,000 chawi tura tih niin, pawisa a chawi loh chuan thla kaw (9) dang a tàn belh ang.

Mi dang 22-te chu kum khat chhung ṭheuh lung-ina táng tur leh Rs 3,00,000 ṭheuh chawi tura tih an ni a, pawisa an chawi loh chuan thla kaw dang an tàn belh ang. Thubuai kaihhnawiha lung-ina lo táng tawhte chu hremnaa an tàn hun chhung turah chhiar tel tur a ni.

Court-in a hrem tâk mi 23-te hi IPC Section 420/468/471 (r/w 120 B IPC) leh PC Act 1988 Section 13(2) [r/w 13(1)(c), (d)] tlawhchhanin hrem an ni.

Mi 23 zinga 21 chu man an ni tawh a, Patul Chakma leh Tamanna Chakma-te erawh chu tun thlengin man an la ni lo a; Special Court chuan diknaa rorelna hlen chhuah ngei a nih theih nan bail theih loha manna thupek, hun tiam bik awm loa man an nih hma atana kenkawh tur (standing non-bailable warrant of arrest) pe chhuak turin thupek a siam bawk.

Special Court chuan, ram pass dik lo siam vanga sum kal ral chu Rs 69,83,500 a nih thu tarlangin, "A hun lai milin a tam tham hle. Sorkarin mimal ram a lâknaah hian hlemhlêtna leh felhlel a hluar hle a, tun hun leh nakin hun atan awmze neiin hremna lekkawh a ngai," a ti.

Ram leilung enkawl­naa thuneitu Land Revenue & Settlement department official-te'n an thuneihna an hmang sual ṭhin chu thil pawi tak a nih thu tarlangin Court chuan, "He thubuaiah phei chuan CADC Executive Committee-te hian ram pass lemte hi dikna hai lanna tisukuk turin an lo ti chhe vekin, a aiah ram pass dang an lo siam chhuak leh a ni," a ti a, dan bawhchhiatna tenawm leh ṭawp tak a nih thu a tarlang.