Indiaskills 2024-ah Mizoram che ṭha
India rama themthiamna (skill) hmanga intihsiakna lian ber, National Skill Competition - Indiaskills 2024-ah Mizoram aiawha telte'n medal pariat - gold pathum, silver pakhat leh medallion of excellence pali a dawng. Gold medal leh silver medal dawngte chu kumin September thlaa Lyon, France-a Worldskills:2024-ah an tel leh ang.
Ministry of Skill Development (MSDE) hnuaia NSDC leh Skill India ṭang dun buatsaih Indiaskills:2024 hi May 15-20, 2024 chhung khan Yashobhoomi Covention Centre, Dwarka, New Delhi-ah neih a ni a, state hrang hrang aṭangin trade 61-ah mi 1,000 chuang an intihsiak. Mizoram aṭangin ṭhalai 16 chu trade 16-ah an tel a, medal pariat an dawng a ni.
Labour, Employment, Skill Develop-ment & Entrepreneurship minister Lalnghinglova Hmar chuan Mizoram team a lawmpui thu a tarlang a, "Mizoramin medal pali leh Medallion of Excellence pali kan la thei hi a lawmawm ka tiin medal late ka lawmpui a, LESDE department-a thawktute an chhuanawm ka ti hle," a ti.
Mizoram team hi LESDE director Angela Zothanpuii hoin official parukin an hruai a, nimin khan Mizoram lo thlengin, Lengpui Airport-ah lawmna inkhawm buatsaih a ni. Tun ṭum hi Indiaskills intihsiakah Mizoram vawi hnih a telna a ni a, kum 2022 khan gold leh bronze medal a lo la tawh bawk.