Tripura-Aizawl inkara gas pipe phûm March 2025-ah zawh hman tum a ni

Chief minister Lalduhoma leh Tripura aṭanga Aizawl khawpuia gas pipe phûm hna thawk mektu Indradanush Gas Grid Limited chief executive officer Ajit Kumar Thakur chu nimin khan CM pisaah an inkâwm a; Tripura-Aizawl inkara gas pipe phûm chu March 2025-ah zawh hman tura tih a nih thu sawi a ni.

CM Lalduhoma chuan, Indradanush Gas Grid Limited hotute chu an hnathawhte a hun taka an zawh theih nan Mizoram sorkarin a ṭulna apiangah puih a inhuam thu a hrilh a; Aizawl an thlen hnua mipui hnena gas sem darh lehna tur ruahmanna pawh chak taka kalpui turin a chah.

Indradanush Gas hotute chuan Chief Minister hnenah hian Hydrocarbon Vision 2023 for NE India hnuaia hma an lak dan tlangpui an sawi a; Panisagar, Tripura aṭanga Aizawl thlenga gas pipeline siam hna thawh mek chu km. 127-a thui a ni a, cheng vbc. 491 senna tur a nih thu sawiin, March 2025-ah zawh hman tura tih a nih thu leh forest clearance an neih tawh thu an sawi a ni.

Chak leh tluang taka hna thawh a nih theih nan Mizoram sorkar puihna an mamawh thu an sawi a; tuna gas pipe an phûm mek chuan kum 25 chhung vel Mizoram mamawh a phuhru thei turah ngaih a nih thu leh, gas bûr hmanga gas lak ai chuan a man a tlàwm zawk hle dawn thu an sawi bawk.