Mamit NGO-te'n CM an kâwm

Chief minister Lalduhoma chu nimin khan a pisaah Mamit NGO Coordination Committee hruaitute'n an kâwm a; Aizawl leh Mamit inkar kawngpui laih meka thil fel lo nia an hriatte leh rawtna an neihte an thlen.

CM Lalduhoma chuan, Mizoram sorkarin hmasawnna hnathawhte endiktu tur Project Monitoring Committee a neih thu sawiin, "Mipuite'n thil fel lo an hriatte rawn thlen zung zung theihna tur Mipui Aw kan nei bawk a, tun hnuah chuan tu mah hian hna an thawh chhiat duh ka ring lo," a ti a; a kaihhruai sorkarah ṭha taka hna kalpui an tum thu a sawi.

Mamit NGO Coordination Committee hruaitute chuan Aizawl-Mamit inkar kawngpui laih meka thil fel lo nia an hriat leh an rawtnate bakah, national highway aṭanga Mamit khaw chhung luhna kawng tihzauh a ṭul thute an thlen bawk a ni.