Intiam anga awm loah sorkar puh

MNF chuan nimin khan an party pisaah chhung inkhawm an hmang a, thu sawitu Lalremruata Chhangte, MNF general secretary chuan, ZPM kaihhruai sorkar chu manifesto-a an intiam angin an awm lo niin a sawi.

Lalremruata Chhangte chuan, ZPM party-in sorkarna an chan hunah development bank an din dawn thu te, ṭhalaite hnenah loan a pung awm lo pek a nih dawn thu te, sorkar chu guarantor-ah a ṭan dawn thute an tlangaupui tih a sawi a, "Sorkarna fawng an vawn hnuah erawh chuan, Mizoram Ceiling on Government Guarantees Act kan lo neih avangin loan pung awm loa pek leh a thlawna sorkar guarantor-a ṭan chu tihhlawhtlin mai theih a ni lo, tiin Mizoram mipui leh ṭhalaite an bum hi mipui zah lohna lian tak a ni," a ti.