Police-te vote thlâktir tura ngenna ECI-in ṭum hnih a hnâwl tawh
State páwna Lok Sabha inthlana duty Mizoram police mi 1,047-te'n vote an thlâk theih nan ruahmanna siam tura Mizoram Election department-in an ngenna Election Commission of India (ECI)-in ṭum hnih an hnâwl tawh.
Additional chief electoral officer H Lianzela chuan Vanglaini palai zawhna chhángin, "Vote thlak hman loa state páwna duty tura Mizoram police kalte'n vote an thlak ve theihna tura ngenna ṭum hnih kan thawn tawh a, ECI-in a lo hnâwl ve ve. An hnâwl chhan kan hre bik lo. Ṭum hnih an hnâwl hnuah ngenna kan la thawn leh lo," a ti.
H Lianzela chuan, PC party-in ECI hnena Mizoram police-te vote thlak tura an ngen chungchangah ECI aṭangin thu dawn an la neih loh thu a sawi.
Thu dawn danin, ECI-in dan thar a duang a, tun hmaa police leh mi dang, vote an neihna hmun ni loa inthlan duty-a chhuah ngaite tana postal ballot hmanga vote thlak theih mai ṭhin chu a titawp a, duty-a chhuak turte'n an chhuah hmaa vote an thlak theihna tur felicitation centre ruahman a ni.
Tun ṭum Lok Sabha inthlanah khan felicitation centre ruahman chu sawi loh, candidate pawh hriat kim a nih hma, ballot paper siam theih hmain state páwna duty tur Mizoram police-te chu chhuahtir an ni tawh.
Inthlan duty tura thu petu ber chu sorkar laipuia Home Ministry a ni a, Mizoramah chuan Chief Electoral Officer pisa kaltlang loin Home/Police department-in an dawng a, Police hotu lamte'n vote thlak hman loin an tír chhuak nia hriat a ni.
Mizoram Election department chuan nimin khan thuchhuah siamin, ECI-in police-te tana vote thlakna tur siam tura a rawn hriattir hun leh Ministry of Home Affairs (MHA)-in police duty turte an duty-na tur hmuna an thlen hun tura a bituk a inhnaih lutuk tih a tarlang.
March 16, 2024-ah inthlan hun puan a ni tih tarlangin Election department chuan, "MHA-in Mizoram police company 15 zinga pariat chu April 1, 2024-ah Bihar-a induction ti turin a rawn hriattir a, Uttar Pradesh-a duty tur compay pali pawh hemi ni vêk hian induction ti tura hriattir an ni. Madhya Pradesh-a duty tur company pathum chu April 8, 2024-ah induction ti turin a rawn hriattir," a ti.
Mizoram Election chuan, Bihar leh Uttar Pradesh-a duty turte chu rél hmanga an kal dawn avangin March 28-29, 2024-ah an chhuah a ngai tih tarlangin, "Hetih hun lai hian candidate list final a la nih loh avangin postal ballot print theih a la nih loh bakah, candidate-te inhnuhdawh theih hun March 30, 2024 thleng a nih avangin hmalak ngaihna a awm lo," an ti a; Mizoramah ngei postal ballot-a vote thlâk turin tihngaihna a awm loh thu an tarlang.
Madhya Pradesh-a duty turte pawh chhuak tlai deuhin, April 3, 2024-ah chhuak mah se, thil tih dan tur ECI hnena an zawhfiah chu April 6-ah ECI-in a chhàn chauh avangin vote thlaktir hman an ni lo tih an tarlang. Mizoram CEO-in April 23, 2024 khan ECI-ah vote chhiar (June 4, 2024) hma ngeia Mizoram SAPF mi leh sa 1,047-te'n vote an thlak theih nan kawng zawn sak turin ngenna a thlen leh mah se, ECI-in vote thlaktir theih a nih tawh loh thuin a rawn chhang niin an tarlang bawk.
MIZORAM INTHLAN HUN BITHLIAH
Nomination thehluh hun tawp - 27.03.2024
Nomination endik hun - 28.03.2024
Inhnuhdawh hun tawp - 30.03.2024
Inthlan vote thlâk ni - 19.04.2024
POLICE-TE THLEN HUN TURA TIH
State Police In report hun
Bihar Coy 8 April 1, 2024
Uttar Pradesh Coy 4 April 1, 2024
Madhya Pradesh Coy 3 April 8, 2024