HSSLC 2024-ah zirlai 9,227 hlawhtling; Pass percentage nikum aiin a hniam hret

Mizoram Board of School Education (MBSE) chuan nimin chhun dar 12 khan Higher Secon­dary School Leaving Certi­fi­cate (HSSLC) Examinations 2024 result a tichhuak a, zirlai exam 11,824 zinga 9,227 hlawhtlingin, pass percentage 78.04% a ni a, nikum 2023-a pass percentage 78.66 aiin a hniam.

Kumin HSSLC exam-ah hian exam hmachhawntu zirlai 11,824-te chu regular student 11,676 leh private candidate 148 an ni a; regular student zingah 9,146 (78.33%) an pass a, private candidate zinga 81 (54.73%) an pass. Pass mi 9,227-te chu mipa 4,274 leh hmeichhia 4,953 an ni.

Zirlai hlawhtling 9,146 zinga 639 chu distinction-ah an pass a, regular student vek an ni. First division-ah zirlai 3,367 (regular 3,356 & private 11), second division-ah 3,525 (regular 3,486 & private 39) leh third division-ah 1,696 (regular 1,665 & private 31) an pass.

Compartmental chance nei zirlai 52 (nikumah paruk) awmin, regular student vek an ni a; zirlai 2,545 (21.52%) an fail a, regular student 2,478 leh private candidate 67 an ni.

Arts-ah Linden Lalrem­ruatpuia s/o C Lalrindika, Venghnuai, Oikos HSS pakhatna a ni a; top 10-ah mi 15 (nikumah 15) langin, mipa pali leh hmeichhia 11 an lang.

Science-ah Lalramdina Ralte s/o Lalṭhakima, Mission Veng, St. Paul's HSS pakhatna a ni a, top 10-a lang mi 11 zinga pakua chu mipa an ni.

Commerce-ah David Lalhminghlua s/o Paul Zakhuma, Cham­phai Vengthlang, St. Paul's HSS pakhatna a ni a, top 10-ah mipa pasarih leh hmeichhia panga an lang.

Zirlai pass vekna sikul hi arts-ah 54 (nikumah 54), science-ah pahnih (nikumah pahnih) leh commerce-ah paruk (nikumah panga) a awm a; zirlai fail vekna sikul - arts-ah pahnih (nikumah pakhat), science-ah pahnih (nikumah pakhat) leh commerce-ah pakhat (nikumah awm lo) a awm.

Kumin HSSLC-ah hian stream tina ti ṭha ber (topper)-te chu mipa vek an ni a; zirlai mipa exam zat leh hmeichhe exam zat aṭanga chhûtin hmeichhe pass percentage (77.79%) aiin, mipa pass percentage (78.32%) a sang zawk.

Arts-a pass percentage sanna ber Mamit district-ah 87.94 a ni a, science-ah Aizawl district sang berin 78.12% a ni. Commerce-ah pawh Aizawl district-ah pass percentage 90.72% niin a sang ber bawk.

HSSLC EXAMINATION 2024

◆ Arts sikul 205, Science sikul 51 leh Commerce sikul 34-ah zirlai 11,994 an awm.

◆ Zirlai 11,824-te exam centre 97-ah an exam.

◆ Zirlai exam 11,824-te chu mipa 5,457 leh hmeichhia 6,367 an ni.

◆ Zirlai exam 11,824 zingah mipa 4,274 leh hmeichhia 4,953 an pass.

◆ Pass percentage - mipa 78.32% leh hmeichhia 77.79%.

◆ Distinction-ah mipa aiin hmeichhia 87-in an tam zawk.

◆ First division-ah mipa aiin hmeichhia 425-in an tam zawk

◆ Second division-ah mipa aiin hmeichhia 363-in an tam zawk.

◆ Third division-ah hmeichhia aiin mipa 196-in an tam zawk.