Improvement atan subject pakhata exam nawn duh tan kuminah exam a theih dawn

Mizoram Board of School Education (MBSE) chairman JH Zoremthanga chuan, HSSLC 2024 result chhuakah New Education Policy (NEP) 2020 zûlzuiin subject pakhatah chauh exam ṭhat (improvement) duh tan kumina compartmental exam rualin exam theih a ni dawn thu a sawi.

Thuthar thehdarhtute'n an kawmnaah JH Zoremthanga chuan, "NEP 2020 zûlzuiin subject pakhatah chauh exam ṭhat (improvement) ti duh tan a kum leh nghah ngai loin compartmental exam rualin kuminah an exam nghal thei ang," a ti.

MBSE Chairman chuan, kumina HSSLC-a hlawhtlingte a lawmpui thu a sawi a; hlawhtling ve lote chu beidawng mai lo a, exam leh huna hlawhtling ngei tawh tura ṭhahnemngai taka zir tur leh bei fan fan turin a chah.

JH Zoremthanga chuan, HSSLC exam tluang taka an zo thei leh ruahman lâwk anga result an chhuah theih chhan pui ber chu zirtirtute inpekna leh ṭhahnemngaihna vang a nih thu a sawi a, "Question set, evaluation, scrutiny, tabulation-ahte an tih tur ṭha taka an hlen chhuah vang a ni," a ti.

School Education department an ṭangrual tih sawiin Zoremthanga chuan, "Directorate lama thawk te, DEO, SDEO leh thawktu dangte, HISSLAM, MISA leh zirtirtute kan thawhhona a ṭhat em vangin a hun takah result kan tichhuak thei," a ti a; MBSE-a thawkte, a bikin Exam Branch-te thawhrimnaah lawmthu a sawi rualin, centre superintendent leh invigilator te, police leh Health department-te'n mawhphurhna ṭha taka an hlen thu a sawi.

MBSE Chairman chuan, HSSLC 2024-ah exam laiin naupang hnawh chhuah ngai an awm lo tih sawiin, lawmawm a tih thu a sawi bawk.

MBSE CHAIRMAN SAWI ṬHENKHAT

▶ Kuminah compartment exam ngai zirlai 52 an awm a, admission an tlai lohna turin compartment exam buatsaih thuai tum a ni.

▶ Compartment exam buatsaih thuai a nih theih nan HSSLC result complaint hun chu result chhuah aṭanga ni sarih chhung hun an hawng.

▶ Kuminah nikum aiin pass percentage 0.62%-in a hniam zawk.

▶ Nikum aiin arts-ah pass percentage 1.37%-in a sang a; science leh commerce-ah a tlahniam thung.

▶ Zawhnate lower order thinking skills (LOTS) aṭangin 60% siam a ni a, a bak 40% chu application leh higher order thinking skills (HOTS) a ni.

▶ Zirnain hma a sawn zel theih nan HOTS question telh tam deuh deuh tura ruahman a ni.