Zirlai pawlte'n lawmthu an sawi

Zirlai pawl pathum - Mizo Zirlai Pawl (MZP), Students Self-Support Union (SSU) leh Mizo Students Union (SSU)-te chuan thuchhuah siamin, HSSLC 2024 result tihchhuah a nih avanga an lawm thu leh zirlai hlawhtlingte an lawmpui thu an tarlang.

MZP chuan, HSSLC 2024 result tichhuak tura MBSE-a thawkte thawhrimnaah an lawm thu an tarlang a; zirlai 11,824 zinga 9,227 (78.04%) an pass chu lawmawm an tih thu leh pass-te an lawmpui thu an tarlan rualin, "La hlawhtling ve rih lote pawh beidawng mai lo a, rilru thar púa hlawhtlinna chang ngei tura bei turin kan ngen," an ti.

SSU chuan, MBSE-in HSSLC result a tihchhuah avanga an lawm thu sawiin, "Zirlai pass zawng zawng kan lawmpui rualin, hlawhtlinna chang lote kan tawrhpui. Stream tina topper-te Zo hnahthlâk vek an ni hi lawmawm kan ti hle," an ti a; zirlai pass lote chu beidawng lo lo tura an chah bakah, result ṭha nei tura zirtirtute inpekna lawmawm an tih thu an tarlang.

MSU chuan, MBSE-in HSSLC result an tichhuak chu lawmawm an tih thu tarlangin, "Zirlai 11,824 aṭanga 9,227-in hlawhtlinna an chang thei hi lawmawm kan ti a; zirlai vanduai ta 2,545 baka zirlai 170 lai absent-te hi MSU chuan pawi kan tihpui a, beidawng loa ṭan la thar zel turin duhsakna kan hlan a ni," an ti.

Central YMA pawhin thuchhuah siamin, "HSSLC result chhuakah a pumpuiah 78.04%-in hlawhtlinna an chang hi lawmawm kan ti a, pass zawng zawngte kan lawmpui tak meuh. Zirlai hlawhtling zawng zawngte an zir leh zelna turah leh an hma lam hunah hlawhtlinna chang zel tura theihtawp chhuah zel turin kan beisei a, duhsakna kan hlan," an ti a; hlawhtling ve rih lote chu hnual loa theihtawp chhuah zel turin an ngen bawk.