IndiaSkills intihsiaknaa telte LESDE Minister-in a lawmpui

IndiaSkills 2024-a Mizoram team zinga medal late chu nimin khan Labour, Employment, Skill Development & Entrepreneurship minister Lalnghinglova Hmar-in a pisaah lawmpuina thingpui a inpui.

LESDE Minister chuan, Mizote'n kut themthiam lamah theihna ṭha tak an neih thu sawiin, "Kan talent hi thawhrimna, inpekna leh tei rei peihna nen kan tihpun phawt chuan India ram chhung leh páwn thlenga langsar turin theihna kan nei a ni," a ti.

Hlawhtling turin pumpelh a awm lo a, taimak leh thawhrim a pawimawh tih sawiin Lalnghinglova Hmar chuan, an thiamnate tipung a, eizawnna tling ngei tura hmang turin a chah a; Mizoramin hlawhtlinna a chan theih nana LESDE department official, trainer leh mentor-te thawhrimna fakawm a tih thu a sawi.

May 15-19, 2024 chhunga New Delhi-a IndiaSkills Competition 2024-ah Mizoram aṭangin trade 16-ah mi 16 an tel a, gold medal pathum, silver medal pakhat leh Medallion of Excellence pali an la a ni.

Floristry (pangpar khawi)-a gold medal latu Maximus Lalruatkima leh fashion technology-a gold medal latu Emily VL Ṭhakimi te chu kumin September thlaa Lyon, France-a World Skills Competition-ah India aiawhin an tel ang.