Rél kawng siamnaa thîrte an ru nasa

Chief minister Lalduhoma chu nimin khan a pisaah Northeast Frontier Railways (NFR) general manager Chetan Kumar Shrivastava leh a thawhpuite'n an kâwm a; Bairabi leh Sairang inkara rél kawng siam mek chungchang an sawipui. Rél kawng siamnaa thîr hmante miin an rûkbo nasat thu an hrilh.

Cheetan Kumar Shri­vas­tava chuan, Bairabi-Sairang rêl kawng chu July 2025-ah zawh hman beisei a nih thu a sawi rualin, "Mizorama rél kawng siam mekah, kan thîrte misualin min ruksak nasa em em a, hetiang hi state dangah a thlen ngai kan hre lo. Gas hmangte'n an tan a, bolt te, bearing-te a bo nasa a, motor-te rawn kengin an phur chhuak hial ṭhin," a ti.

Rél kawng siamna hmanruate rûkbo a tam avangin an mangan hle thu sawiin Cheetan Kumar Shrivastava chuan, "Hetiang reng a nih chuan lei (bridge) tam takte hi chhiatna nasa zawk thlen thei a ni," a ti a, FIR an thehluh ṭhin thu a sawi. NFR hotute hian CM chu rûkrute'n rel kawng siamna hmanrua an rûkna hnu thlalak eng emaw zat an entir a ni.

CM Lalduhoma chuan, rél kawng siam meka harsatna awmte a hnenah thlen ṭhin turin a lo chah a; Sairang chawlhhmunah RoRo system (Roll on Roll off) awm thei se a duh thu te, a taka rél a luh hunah ram leilung fate a tam thei ang ber hna thawka chhawr ni se a duh thute a sawi bawk.

Chief Minister hi Transport secretary Dr Lalzirmawia Chhangte-in a ṭawiawm a ni.