AMC-a thawkte'n Tuikual lui an tifai

Aizawl mayor Lalrinenga Sailo hoin Aizawl Municipal Corpo­ration-a corporator-te leh AMC-a thawktute chu Save The Riparian pawl nen ṭanghoin Tuikual luiah an hnatlang a, bawlhhlawh ṭawih thei lote an thian fai.

Hnatlangah hian Aizawl Mayor bakah, deputy mayor R Thang­lura, AMC executive corpor­ator te, corporator te, AMC commissioner Lalhriatpuia leh AMC pisaa thawk mi 150 vel an tel.

Tuikual lui hnâr, Khatla Field thlang kawr aṭanga ṭanin, bawlhhlawh chi hrang hrang - plastic ûm, sarâng, bûr chhia, pawnchhia leh thil dangte an chhar khawm a; Solid Waste Management Center, Tuirialah an paih a ni.

Mayor Lalrinenga Sailo chuan, lui tui a thianghlim theihna tura Save the Riparian hmalakna chhuanawm a tih thu a sawi a; Aizawl khawpui faina turin AMC-in theihtawp a chhuah mek tih sawiin, nasa leh zuala hma an lak zel dawn thu a sawi.