CM hoin ruihhlo do dan tur duang

Mizoram sorkarin a din, Ruihhlo Do Core Committee chu an chairman Lalduhoma, chief minister hoin CMO Conference Hall-ah an ṭhukhawm a, ruihhlo do dan tur an duang.

CM Lalduhoma chuan, Ruihhlo Do Core Committee ṭhutkhawm hnuhnung ber chu kum 2022-ah a ni tih sawiin, thâ thlah loa ruihhlo do ngar ngartute chungah a lawm thu a sawi a, "Sorkar tharah hian tun hma aia nasa leh hlâwk zawka ruihhlo do kan tum dawn a, ruahmanna ṭha leh ṭangkai tur chu kan sawiho dawn a ni. Ruihhlo donaa sum leh pai mamawh turte a ṭul angin kan ngaihtuah zel ang," a ti.

Home minister K Sapdanga, Social Welfare & Tribal Affairs minister Lalrinpuii leh Excise & Narcotics minister Lalnghinglova Hmar ten an department-in ruihhlo donaa ṭan an lak dante an tarlang.

Ṭhutkhawmah hian, Mizorama ruihhlo lut (supply) tihtlemna tura hmalakna chu Excise & Narcotics department kenkawh turin an ti a; ruihhlo lut titlem tura sum leh pai mamawh te, ruihhlo dona lama sorkar puitu tlawmngai pawlte hnena thuneihna pek dan tur leh an hmanraw mamawh pek dan turte an rél. Ruihhlo ngaite enkawlna lam chu Social Welfare department kenkawh turin an ti.

Lungleia TNT hmunhma sakna tur sum hmuh a nih thu te, de-addiction centre sakna tur Ministry of Tribal Affairs-ah dap mek a nih dan te, district jail pasarih thuam ṭhatna turin hmalak mek a nih thu te, ruihhlo ngaite enkawlna lama thawhpui tur ram dang thlenga dap a nih dante tarlan a ni.

Ṭhukhawmah hian chief secretary Dr Renu Sharma, DGP Anil Shukla leh Core Committee member-te an tel.