KHAWTHLIR

KTP-in thisen pe

KṬP, Serchhip Peniel Branch chuan nimin khan thisen pek an huaihawt a, Serchhip District Hospital tan thisen unit 28 an pe a, petute mipa 16 leh hmeichhia 12 an ni.

Career guidance

Assam Rifles chuan May 20, Thawhṭanni khan Farkawn Higher Secondary School-ah 'Career Guidance Lecture' hun an buatsaih a; sipaia ṭan ṭhatna leh luh theih dan bakah, thil dang chi hrang hrangah zirlaite'n an hma lam huna kawng an zawh theih turte an hrilhfiah. AR hian May 20 vek khan Aizawla an hmunah 64th ARESA Raising Day an hmang bawk a, AR-a ṭang tawhte leh an nupuite an tel a ni.

Party-te'n lawmpui

MNF party, ZPM Ṭhalai leh Congress party zirlai pawl National Students Union of India (NSUI)-te chuan thuchhuah siamin, HSSLC 2024 result tluang taka tihchhuah a nih chu lawmawm an tih thu te, hlawhtlingte an lawmpui thu leh duhsakna an hlan thute an tarlang. La hlawhtling ve rih lote chu hnual mai lo a, hlawhtling ngei tura theihtawp chhuah zui zel turin an chah hlawm bawk.

Kawngpui sial tura duante thlirho

Chief minister Lalduhoma hoin Planning department leh PWD hotute chuan nimin khan North East Special Infrastructure Development Scheme (NESIDS) hmanga kawngpui sial tur ruahmanna duante an thlir. NESIDS sum hmanga kawngpui pawimawh pali siam dan tur te, sum mamawh zat tur, forest clearance chungchang leh bawhzui zel dan turte an sawiho a ni.

MLA-in hawng

Hachhek bialtu MLA Robert Romawia Royte chuan nimin khan Laldenga Football Ground, Tuidamah RRR Cup for Kawrthah Zone Football Championship 2024 a hawng. Inelnaah hian mipa team 19 leh hmeichhia team pali an tel a ni.

Bank hnathawh thlir

Mamit DCC/DLRC/DLSC chu nimin khan an chairman VL Remliana, bawrhsap hoin an ṭhukhawm a; Mamit district-a bank-te January-March credit deposit (CD) ratio chu 74.11% a nih thu tarlan a ni.