MBBS leh BDS zir tumte SMATE exam turin chah

Higher & Technical Education (HTE) department chuan, MBBS leh BDS zir tur thlan danah thu chiang tak a la awm theih loh avangin Mizo zirlai, MBBS leh BDS zir tumte chu State Medical and Technical Entrance (SMATE) Examination 2016 exam tel phawt turin an chah.

HTE department chuan, "MBBS leh BDS zir tur thlan dan turah thu chiang a la awm thei lo a, Supreme Court thutlukna tidanglam turin sorkar laipuiin Ordinance a buaipui mek," a ti a; hei vang hian Mizoram sorkar quota-a MBBS leh BDS zir tumte chu SMATE 2016 leh National Eligibility-cum-Entrance Test (NEET) Phase-II exam kawp phawt turin an chah a ni.

HTE department chuan May 24, 2016 hian SMATE a buatsaih dawn a; MBBS leh BDS zir tur thlan nan hman a ni ta lo a nih pawhin, technical course danga Mizoram quota-a zir tur thlanna atan hman a ni ang.

Tarlan tawh angin, Bachelor of Medicine, Bachelor of Surgery (MBBS) leh Bachelor of Dental Surgery (BDS) zir tur thlan nan NEET chauh hman turin Supreme Court-in thutlukna a siam a ni.

NEET hi May 1, 2016 khan a thawh khatna buatsaih a lo ni tawh a, zirlai 6,50,000 chuangin an hmachhawn. Supreme Court-in NEET paltlang a ngai a tih tâk avangin NEET Examination Phase-II chu July 24, 2016-ah a buatsaih leh dawn a; Phase-I leh Phase-II result chu a rualin August 17, 2016-ah tihchhuah a ni ang.

Hetih lai hian, sorkar laipuiin medical line-a Mizoramin quota a neih zat tur an la tichiang lo. Kum 2015-ah kha chuan Mizoram sorkarin MBBS-ah quota - Central pool-ah 25 leh NEC-ah pathum, BDS-ah quota Central pool-ah pathum leh NEC-ah pasarih a nei a ni.