Rangkachak rûkbo thubuai Court-in Joseph Lalrosiama bail a pe

Rangkachak tawlhrûk December 14, 2015 zana suam leh rûkbonaa inhnamhnawiha puh, Assam Rifles sipai Joseph Lalrosiama, Kanan Veng, Aizawl chu May 18, 2016 khan Additional District & Sessions Court, Aizawl chuan interim bail a pe.

Joseph Lalrosiama hi April 27, 2016-ah man niin, April 28-ah Court-ah hruai a ni a, Court chuan police kuta darkar 48 chhung awm turin a ti.

Chumi hnuah police-in an kuta awm turin ṭum thum - April 30, May 2 leh May 4-ah - an ngen leh a, Court-in a phalsak. May 6-ah Court chuan jail-a awm turin a ti a, May 11-ah Court-ah hruai leh niin, jail-a awm chhunzawm turin a ti leh a; May 18 khan interim bail a pe ta a ni.

Lalrosiama ukil C Lalfakzuala sawi danin, Joseph Lalrosiama hi police kuta a awm laiin an dâwpnaah police-in kut an thlak a, May 5-ah Aizawl Civil Hospital OPD-ah a beng entir a ni a, a beng dinglam bengdar a chhia tih doctor-te'n an lo hrilh. A damdawi lehkhaah chuan doctor-te chuan May 12-ah a beng chu entir nawn leh tur leh May 16-ah admit turin an ziak.

Police-in an dâwpna lama kut an thlâk chu Indian Constitution-a Article 21-na bawhchhiatna a nih avangin May 13-ah Gauhati High Court, Aizawl Bench-ah Joseph Lalrosiama ukilte chu an zualko a; High Court chuan Lalrosiama medical report vawiina Court-a thehlut turin jail superintendent a hriattir a ni.

Joseph Lalrosiama ukilte chuan police-in kut an thlaknaah a bengdár a chhiat phah avangin Mizoram sorkar chu zangnadawmna Rs. 5,00,000 pe turin an phût. Kutthlaktu police-te chhui chhuak a, an laka dan anga action la tur leh, rangkachak rukbo thubuai chhui hna chu dik taka tih an phut bawk.

Joseph Lalrosiama ukilte'n an khinte chu - Mizoram sorkara Chief Secretary, DGP, Home Secretary, DIG (Northern Range), CID Addl. SP, Aizawl Police Station OC leh Kulikawn Police Station OC-te an ni.