KHAWTHLIR

Rest house hawng

Minister H Rohluna chuan nimin khan Teikhang khuaah rest house sak thar a hawng. Rest house thar hi Rs. 14,20,000 sênga sak a ni a; H Rohluna chuan, hmasawnna hna thawnnaah nawr ngai deuh awm mah se, dawhthei taka nghah a ṭul fo tih sawiin, "Sorkar chuan mipui mamawh a hria a, a ti zel bawk ṭhin," a ti. Rohluna hian May 18, 2016 khan a bial chhunga Ngopa khuaah State Bank of India ATM booth thar a
hawng bawk.

Kutthlak dem

Mizoram Truck Driver Association (MTDA) sub-headquarters, Champhai leh Lawngtlaite chuan thuchhuah siamin, tun hnaia Saikhawthlir khaw mi ṭhenkhatin an member-puite kut an thlak chu an dem thu an tarlang a; hemi chung-changa MTDA ngaihdan chu an thlàwp tlat thu leh driver kutthlaktute an phû tâwka hrem an phut thu an sawi.

CM pian champha

Nimin kha chief minister Lal Thanhawla pian champha a ni. CM Lal Thanhawla hi prime minister Narendra Modi chuan Twitter kaltlangin lawmpuina thu a thawn a; hriselna ṭha nei nena kum tam tak dam turin duhsakna a hlân a ni.

MFA GB Meeting

Vawiin chawhnu dar 1:00 hian RG Stadium, Mualpuiah MFA General Body Meeting neih a ni dawn. MFA hian season liam ta thlirletin season thar atana Mizoram football kalphung tur an duang ang.

PRISM inthlang

PRISM chuan nimin khan IPR directorate Auditorium-ah Annual General Body Meeting an nei a, kum 2016-18 chhunga office bearer turte an thlang. Official nomination-a mite vek an thlang tling a, chungte chu - president-ah Vanlal-ruata, vice president-ah Dr H Lallungmuana leh K Tlanthanga, treasurer-ah HK Liansawta te an ni.

Live phone-in

DDK, Aizawl chuan vawiin tlai dar 5:30 - 6:30 hian sorkar laipuiin mipuite hmasawnn tura ruahmanna a siam Mizorama thawh mek chungchanga mipuite zawhna chhanna hun live phone-in programme an buatsaih dawn.