Mamit-ah huaisen chawimawina hlân
Mamit district aṭanga huaisen lawmman, Uttam Raksha Padak Award (URPA) 2015 leh Jeevan Raksha Padak Award (JRPA) 2015 dawngtute hnenah nimin khan Mamit DC Lalbiaksangi'n DC Conference Hall-ah an lawmmante a hlan.
Huaisen lawmman dawngtute chu - Laldinpuia, South Sabual (URPA); R Rothantluanga, Lallen (JRPA); Podo Soba, Marpara North (JRPA) leh Syamol Kanty Chakma, Marpara North (JRPA)-te an ni. URPA hian thuchei, medal leh Rs. 60,000 a keng tel a; JRPA chuan thuchei, medal leh Rs. 40,000 a keng thung.
Nimina chawimawina hlannaah hian a dawngtute aṭangin R Rothantluanga chiah a tel thei a, mi dangte chu rokhawlhna vangin an tel thei lo.
Laldinpuia (URPA)
Laldinpuia s/o B Lalrema, S. Sabual hian an ṭhianhoa ram riahnaah savawm no hruai lai tâwkin, savawm chuan an ṭhiannu Lalhmunmawii seh tumin a bei a; Laldinpuia chuan chemin savawm lú-ah a lo sat a, savawm chuan Laldinpuia chu bei lehin, ft. 30 vela thui an lum dun a, savawm chu a insaseng ta a ni.
R Rothantluanga (JRPA)
June 25, 2014-ah Saithah leh Phuldungsei inkara electric 11 kV line siamṭhain R Rothantluanga leh a ṭhiante an thawk a, hna an thawh mek laiin, chhun dar 11:45-ah current a kal thut a, current chuan electric ban lêra awm mek Lalpeksanga, Lallen a man. Lalpeksanga a chhanna lamah R Rothantluanga pawh chu current-in a man a, a hnungzáng a kâng chhuak deuh vek a, a mawngtam leh a malpui hmun 15-ah electric current chhuahna pem a awm a ni.
Podo Soba (JRPA)
Podo Soba w/o Arunkanti, Marpara North hi July 8, 2015 khan Mar lui kai tumin motorboat-ah mi dang 15 nen an chuang a, lawng chu khaikhup thutin, a chuang zawng zawng luiah an tla vek a ni. Podo Soba hian tuihleuh a thiam a, Lalsiamliani w/o Lalsangzuala leh a fanu kum thum mite a chhanchhuak a ni.
SK Chakma (JRPA)
Syamal Kanty Chakma, Marpara North pawh hi July 8, 2015-a Mar luia marboat chetsualnaah a tel a; marboat-a chuang ve dang, Lalsangzuala leh a fate pahnih chu a chhanchhuak. Lalsangzuala chu lawnga an dah hnuah lawng aṭanga tla lehin, a thi a ni.