CM-in sorkar hriatpui lohin ramri khâr tawh lo se a duh thu sipai lal a hrilh

Indian Army-a Eastern Com­mand hotu ber general officer com­man­ding-in-chief (GOC-in-C) Lt.Gen. RC Tiwari chu Mizoram­ah a rawn zin a, May 21, Thawhlehni khan Governor leh Chief Minister a kâwm. CM chuan, tun hnaia Mizoram sorkar hriatpui loha India leh Myan­mar ramri khâr ang chi chu thleng tawh lo se a duh thu a hrilh.

Lt. Gen. RC Tiwari chuan Gover­nor Hari Babu Kambhampati nen Raj Bhavan-a an inkawmnaah, ramri hrúla venhimna lama hma­laknate leh harsatna hmachhawn tura Assam Rifles inbuatsaih dan tlangpui a hrilh. Larsap chuan, Mizorama Assam Rifles-te'n mipui tan hna ṭha tak an thawh thu sawiin, lawm­awm a tih thu a sawi.

CM Lalduhoma chuan a pisaa Lt.Gen. RC Tiwari nen an inkawm­naah, Assam Rifles-in kum tam tak chhung Mizo mipui hna ṭha tak tak an thawh sak tawh avanga a lawm thu a sawi rualin, sipaiin mipui nunphung nghawng thei thil an tih dawnin state sorkar nen inràwn tawn ṭhin a duh thu a sawi.

Chief Minister chuan, "Tun hnaiah Burma nena kan inrina friendship bridge chu sipaite'n an khâr a, Home Ministry lamin chutiang thil engmah an hre lo a, keini'n kan lo hre bawk si lo. Khatiang kha awm tawh lo se kan duh," a ti.

Zokhawsanga rama Assam Rifles hmun paltlanga loneitute feh kawng thar laih a ṭul thu sawiin Lalduhoma chuan, "Tuna an laih thar saw loneitute tan hman tlak a ni meuh lo a, a thui lutuk bawk. Kawng thar laih ngei kan duh," a ti a; kawng thar laihah a ṭul a nih chuan kawng sir tawn tawn hung mai ṭha a tih thu a sawi.

CM Lalduhoma chuan, Lam­mual chu Aizawl lailia awm a nih angin mipuiin an mamawh fo tih sawiin, "Politics thila punkhawm ni lo, thil dangah chuan tun aia zalên zawka min hmantir kan duh," a ti.

Chief Minister chuan, ruihhlo dona lamah nasa zawka ṭan la tura sipaite sáwmin, "Mizoram sorkar chu nasa taka ruihhlo do tumin a inpuahchah mek a ni," a ti a; ruihhlo do tura ruahmanna tlangpui a hrilh.

Lt.Gen. RC Tiwari chuan, Mizorama awm sipaite'n Chief Minister ngenna leh rawtna apiang­te an ngai pawimawh tur a nih thu a sawiin, "Kawng tin­réngah sorkar kan thawhpui tur a ni," a ti a, CM sawite chu an ngaih pawimawh tur thu a sawi.

Lammual hman chungchanga Chief Minister ngenna chu a hlawhtlin theih nan a naute a lo hrilh tur thu Lt.Gen. Tiwari chuan a sawi a, "Zokhawsang ram pawh a rang lama ngaihtuah a ni ang," a ti.

Lt.Gen. RC Tiwari chuan, ruihhlo donaah theihtawp an chhuah zel dawn thu sawiin, "Mizote hi hnam inhlâwm khawm ṭha, hnam thuawih tak in ni a, in ṭan rual ṭhat chuan ruihhlo donaah hma in sawn em em ang," a ti a; mipuiin kohhran thu an awih ṭhin avangin kohhrante pawh ruihhlo donaah nasa zawkin ṭan la se a sâwt a rin thu a sawi bawk.

Army-a Eastern Command General Officer Commanding-in-Chief hi Assam Rifles-a inspector general (East) Maj.Gen. SK Bhambhu, 23 Sector deputy inspector general Brig. Girish Upadhya leh sipai officer dangte'n an ṭawiawm a ni.