Ramri hung leh FMR tihtawpah Central aṭangin thu la dawng lo

Mizoram sorkar chuan India leh Myanmar inrìna hung chungchang leh free movement regime (FMR) tihtawp chungchangah sorkar laipui aṭangin thu dawn a la nei lo.

Vanglaini palai zawhna chhangin Home department hotute chuan, ramri hung leh FMR tihtawpah sorkar laipui an la reh vang vang thu an sawi a, "Official-in min la rawn hriattir lo a, Mizoram chhungah chuan hma an lak pawh hriat a ni lo. Mizoram sorkar chuan ramri hung leh FMR tihtawp a duh loh thu a thlenna a rei tawh," an ti.

Home department hotute chuan, ramri hung leh FMR tihtawp chu sorkar laipuiin Mizoramah a taka an kalpui dawn leh dawn loh an la hriat loh thu an sawi a ni.

Chief minister Lalduhoma chuan May 8, 2024-a Zo Re-Unification Orga­nisation (ZORO) hruai­tute'n an kawm ṭumin, Mizo­ram bikah chuan ramri hung leh FMR hlih a nih loh mai theih thu a lo hrilh.

Chief Minister chuan, ramri hung lo tur leh FMR hlîp lo tura Prime Minister leh Union Home Minister a sawipui tawh thu a sawi a, "Mizoram area bikah border fencing ti lo tur leh FMR hlîp lo turin ka ngen tawh a, Mizoram bik chu han ngaichâng phawt ila, border fencing leh FMR hlih hi an ti lo mai àwm mange ka ti a ni," a ti.