Skywalk/ropeway thubuai chhui mek zel; ACB leh PWD-in a hmunah an enfiah dawn

Sakawrhmuituai tlanga skywalk leh Chaltlang - Durtlang inkara ropeway siam chungchang chu Anti Corruption Bureau (ACB)-in an la chhui mek a, PWD nen a hmunah an enfiah dawn.

Vanglaini thu dawn danin, ACB hian a hmunah PWD-te nen enfiah ṭul an tih avangin a huhoa enfiah a ṭul thu PWD an hriattir a; PWD chuan enfiahnaa kal tur engineer an ruat tawh a, an mi ruatte chu ACB-ah an hriattir tawh. Hun remchang hmasa berah an enfiahho dawn a ni.

Sakawrhmuituai skywalk leh Durtlang-Chaltlang ropeway thubuai hi ACB chuan ngawrh takin chhui mah se, an la chhui zo hnai dawn lo. Buaipui leh zir chian ngai eng emaw zat a la awm.

Ropeway leh skywalk siamtu JV NEIP chu Delhi-a awm an nih avangin chhui hun chhung a rei a, zawh a la ni lo. JV NEIP hian tun hma chuan Aizawlah pisa an nei ṭhin a, mahse, tunah chuan an nei tawh lo. Delhi-a kalchilh emaw, Mizorama koh chhoh emaw a ngai ṭhin.

Tarlan tawh ṭhin angin, MNF party-a Vigilance department leh Legal Board chuan skywalk leh ropeway siamnaah thil dik lo a awm nia ngaiin November 22, 2021 khan Lokayukta-ah complaint an thehlut.

Chhui phalna December 7, 2021 khan Mizoram sorkara Vigilance department-ah thehluh a ni a; Vigilance chuan a zir chian hnuah December 17, 2021 khan chhui phalna a tichhuak a, ACB-in December 22, 2021-ah an dawng. ACB hian January 2022 laihâwl velah a chhui ṭan a ni.

Tourism department pawhin skywalk leh ropeway chungchang chu Director hmingin February 3, 2022 khan Lokayukta-ah an thlen. Lokayukta-in thil hrang hrang a zawh lêt zingah, rinhlelh an neih leh neih loh chungchang a tel a, Tourism department hotute chuan mimal/company rinhlelh tarlan an nei lo.