HSSLC-ah sorkar sikulte result a chhe ber

Higher Secondary School Leaving Certificate (HSSLC) Examination 2024 result tihchhuah tâkah arts, science leh commerce stream-ah chawhrualin deficit school-te pass percentage a sang ber a, sorkar sikulte pass percentage a hniam ber.

HSSLC Examinations 2024-ah hian arts, science leh commerce stream-ah deficit school zirlai exam 1,549 zinga 1,333 an pass a, pass percentage 86.06 niin, sikul ṭhen hrang hrang zingah pass pencentage a sang ber a ni.

Private school-te'n arts, science leh commerce-ah zirlai an ngah ber a, exam hmachhawntu 4,898 neiin, chu'ng zinga 4,054 (82.77%) chu an hlawhtling. Arts, science leh commerce-ah govt. aided school-te'n zirlai exam 581 neiin, 466 (80.21%) an pass a; lumpsum school-te'n zirlai exam 1,405 neiin, 1,052 (74.88%) an hlawhtling.

Sorkar sikul aṭangin arts, science leh commerce-ah zirlai 3,243 exam in, chu'ng zinga 2,241 chu an hlawhtling a, pass percentage 69.10% niin, sikul ṭhen hrang hrang zingah a hniam ber.

Sikula lut loa exam (private candidate) 148 an awm a, chu'ng zirlai 81 chu an hlawhtling a, pass percentage 54.73 a ni.