Mamita sorkar hnathawk dàwr tur awm mumal lo ngaimawh

Mizo Zirlai Pawl (MZP) Headquarters, Mamit hruaitute chuan, Thawhṭanni leh Zirtawpni-ah Mamita sorkar department hrang hrang pisaah dawr tur an awm mumal lo tih sawiin, an ngaimawh thu an puang.

MZP Hqrs, Mamit hruaitute chuan nimin khan Mamit Press Club-ah thuthar thehdarhtute an kâwm a; an president Lalthansanga chuan, Mamit khawpuia sorkar hnathawkte chu Thawhṭanni leh Zirtawpni-ah an pisaah dawr tur awm mumal lo ṭhin tih sawiin, "Kan ngaimawh hle a, mipui harsatna tawh ṭhin sutkian a nih theih nan hmalak kan tum," a ti.

Mamit MZP president Lalthansanga chuan, Mamit khawpuia hnam dang, Inner Line Permit (ILP) nei lo an awm leh, ILP nei pawh an ILP neih ang ni loa hna thawkte an ngaimawh thu sawiin, "En zui a, police lam nena ṭangkawpa hmalakna kalpui kan tum," a ti a; Mamit khawpuia hnam dang, dan loa sumdawnna kalpui an awm leh awm loh pawh enfiah an tum thu a sawi.

Jawaharlal Nehru Vidhyalaya (JNV), Mamitah chi leh hnam bil anga inthliarna awm ṭhin anga sawi chu enfiaha siamṭhat an tum thu te, tun hnaia HSLC leh HSSLC result chhuaka zirlai hlawhtlingte an lawmpui thu leh hlawhtling ve rih lote chu beidawng loa ṭhahnemngai taka zir chhunzawm zel tura an duh thute Mamit MZP hruaitute chuan an sawi bawk.