Mizorama thar buh lei dan tur sawiho

Chief minister Lalduhoma, Agriculture minister PC Vanlalruata, Food, Civil Supplies & Consumer Affairs minister B Lalchhanzova leh sorkar official-te'n nimin khan CMO conference hall-ah Mizorama thar buh (buhhûm) lei dan tur an ngaihtuah.

FCSCA minister B Lalchhanzova chuan, Mizoram sorkarin buhfai lei leh hralh a kalpui ṭhin dan chu tihdanglam hlek tum a nih thu a sawi a, "Model Code of Conduct hlih a nih hunah a taka kalpui ṭan kan tum dawn. He kalphung tharah hian kum tin sorkar sum vbc. 70 vel kan hum thei dawn a ni," a ti.

Ṭhutkhawmah hian, minimum support price pea Mizoram loneitute thar buhhûm man tlâwm deuh taka lei theih a nih leh nih loh sawiho a ni a; Mizorama buh thar tihpun dan tur leh buh chíngtu tur thlan te, buh chi inang chìn a ṭul dan te, buhhûm lei khawm dan te, buh herna leh phurh kual dan turte sawiho a ni.

Buhhûm lei chung­changa Tripura leh Assam sorkar kal dan zir chiangtute'n an thil zir chhuahte an sawi a; chipchiar zawka zir chiang­tu tur Supply Minister kaihhruai team an din nghal a ni.