ASF chungchanga hmalak dan tur rêl

Vawk pùl hri, African Swine Fever (ASF) kaihhnawihah nimin khan Kolasib district hotute an ṭhukhawm a; Mamit district hotute pawhin ASF chungchanga hmalak dan tur an sawiho.

Kolasib District Level Coordination Committee on ASF chu district bawrhsap John LT Sanga kaihhruaiin DC conference hall-ah an ṭhukhawm a, ASF laka invênna kalpui dan tur leh hri vanga vawk thi a awma hmalak dan turte an rél. Sorkar hotu te, khawtlang leh tlawmngai pawl hruaitute an tel a ni.

Kumin 2024-ah ASF vangin Kolasib district-ah vawk thi la awm lo mah se, Mizorama khaw hrang hrangah hri a darh mek avangin fimkhur taka hmalak ran a ṭul thu an sawi a; ASF lènna khua aṭanga vawk leh vawksa aṭanga siam lak luh khap a ṭul thu te, ramria check gate-ah vawk leh vawksa aṭanga thil siam lak luh a nih loh nan endik dan tur te, vawk damlo a awma rang taka thuneitute hriattir theih dan tur leh ran thi sawngbawl dan turte an rêl.

Mamit District Level Coordination Committee on ASF chu additional DC Zoremthara Ralte hoin an ṭhukhawm a; ASF chungchanga hmalak dan tur te, vawk suat, vawk thi phûm leh sâwngbàwl chungchangte an sawiho.

Mizoram hmun ṭhenkhata ASF léngin Mamit district a la thleng lo nia hriat a nih thu leh hri laka him theihna tura DC thuchhuah tawh chu mipuiin an ngaih pawimawh a ṭul thu an sawi a; thupek bawhchhiate hrem dan tur leh thupek kenkawh dan turte an siam.

Mamit district-a khaw tinah VC kaihhruaina hnuaiah NGO-te leh vawk vulhtute telna task force din an rél a; ASF vanga vawk suat ngai a awm chuan AH&Vety department leh vawk neitute inberáwna hmalak ni se, an ti. Vawk thi phùm leh sâwngbàwl chungchangah, phûmna tur hmun bik siam loin, vawk neitute'n an hmun âwlah phúm mai ni se, an ti a; ṭha takin an phúm ngei em tih village task force leh AH&Vety-in en zui se an ti bawk.

Ṭhutkhawmah hian Zawlnuam leh Dapchhuaha police check gate-a duty-te'n ASF pu darh thei tur vawk lak luh awm thei lakah nasa lehzuala hmalak an rel bawk a ni.