Reiekah Biological Diversity Day hmang

Mizoram Pollution Control Board (MPCB) hnuaia Mizoram EIACP Hub chuan nimin khan Reiek tlangah International Day for Biological Diversity (May 22) an hmang a, Reiek Higher Secondary School leh Ailawng High School zirlaite leh zirtirtute telin, leilung leh a chhunga awmte humhalh leh enkawl dante an zirtir.

MPCB chairman Liankima Lailung chuan, Reiek khuaa zirlaite chu biological hotspot huam chhunga an awm avangin an vanneih thu sawiin, ngaihlut nacháng hre turin a chah a; khawvel hmun danga la hmuh ngai loh Reieka an hmuh chhuah species a awm thu sawiin, a hming atan Aeschynanthus reiekensis vuah a nih thu a sawi.

Resource person M Sawmliana, Mizoram Forest Service (Rtd) chuan, Reiek leh Ailawng khuate chu thlai, thing leh mau (plant biodiversity)-ah a hausak thu leh a bikin naubán leh hnim chi hrang hrang khawvel hmun danga an hmuh ngai lohte pawh a awm nual thu a sawi a; ramngaw, thing leh maute humhalh a pawimawhzia a sawi bawk.

International Day for Biological Diversity hmannaah hian Mission LiFE thutiam - leilung leh a chhunga awmte humhim tur leh chumi atana nunphung thlak danglam ngaite thlak danglam tura intiamna thu an sawi rual a ni.

Inkhawm zawhah khawvel ram danga váng tak Globba wengiri leh Globba radicalis (Aithîng) ṭiak eng emaw zat Reiek tlangah an phun a; Reiek tlang leh a chhehvela hman khat daih sarâng (plastic) bawlhhlawh paihte an chhar fai bawk.