Lunglei district-ah TB vei awm lohnaah khaw 18 puan a ni tawh

Lunglei Chief Medical Officer pisa chuan nimin khan Lunglei DEO conference hall-ah World TB Day leh TB Free Village lawmna hun an buatsaih a, bawrhsap Ramdinliani'n hmanpuiin, khaw 18 hnenah TB Free Village lawmman - Mahatma Ghandhi statue (bronze) leh thuchei hlan a ni.

Lunglei district TB officer Dr K Lalhmachhuana tarlan danin, Ministry of Health & Family Welfare chuan India ramah kum 2025-ah TB umbo a nih theih nan state tinah TB Free Village kalpui turin a ti a, Mizoramah pawh kalpui a ni. Kum 2023 khan Mizoramah TB Free Village puang thei district pathum an awm a, Lunglei district-ah chuan TB Free Village-ah khaw 18 puan a ni tawh.

Kum 2023 khan Lunglei district-ah TB vei mi 150 hmuh chhuah a ni a, chu'ng zinga mi 15 chuan HIV an vei tel. Mi 134 enkawl dam tawh niin, mi pangain an thihpui a, mi 11 enkawl mek an ni. Kuminah Lunglei district-ah TB vei mi 62 hmuh chhuah a ni tawh a, mi pali chu HIV vei tel an ni.

Lunglei district TB Free Village-te chu - Chhipphir, Bualpui-V, Sekhum, Mualṭhuam North, Sertlangpui, Serte, Ṭhuampui, Vaisam, Chithar, Ṭhangte, Sairêp, Belthei, Tarpho, Ṭhualṭhu, Bualte, Kawlhawk, Zotuitlang leh Ralvawng khuate a ni.

Ramdinliani chuan, TB Free Village nei tam ber district an ni thei chu thawktute inpekna leh khawtlang hruaitute hmalakna rah a nih thu sawiin, "TB hi inkai chhàwn theih a nih avangin mihring tamna leh an bitna hmunah a tam duh bik a, India ram pawh khawvela TB natna vei awm tamna a ni," a ti a, sorkarin theihtawpin a chhuah avangin zawi zawia hmasawn a nih thu a sawi.

Ngawr (TB) chu mi tam takin an en dan a dik lo a, thinhrik an awm ṭhin tih sawiin Bawrhsap chuan, "TB hi thinhrik leh hlauh chi a ni lo tih kan inzirtir tam a ngai. Kan chhungte zingah TB vei an awm pawhin thinhrik leh enhrang lo a, natna dang ang bawka enkawl dam thuai theih a ni hriat a ṭul," a ti.