Ṭhelrêt enkawl leh sâwngbàwl dan zir

Chief minister Lalduhoma thuràwn angin Land Resources, Soil &Water Conservation (LRSWC) department officer-te chuan May 20-22, 2024 chhung khan Rubber Board of India hmunpui Kottayam, Kerala-ah ṭhelrêt enkawl dan leh sâwngbàwl dan an zir.

LRSWC Team of Officers hi joint director Rosy Lalmuansangi Hmar, under secretary H Malsawmi, OSD (Rubber) C Rinsangpuia leh SC ranger Lalṭhafamkima te an ni a; Rubber Board of India-a ṭhelrêt chíngtute hamṭhatna awm theite dap chhuak tur leh Mizorama Rubber Mission hlawhtling taka kalpui a nih theih dan zir turin May 19 khan Aizawl an chhuahsan a, Kottayam, Kerala an pan a ni.

Team of Officers hian May 20, Thawhṭanni khan Rubber Board of India hotu ber executive director M Vasanthagesan leh a thawhpuite an kâwm a; ṭhelrêta Mizoram tana thil pawimawh hrang hrang an sawiho.

Sorkar thuchhuah tarlan danin, Rubber Board of India hnuaiah hian Rubber Research Institute leh National Institute for Rubber Training changtlung tak a awm a; chu'ng zirna-inahte chuan Mizorama ṭhelrêt chíngtute leh ṭhelrêt chìn leh sâwngbàwl lama tui ṭhalaite tan chhawr ṭangkai theih a nih thu an lo hrilhfiah.

Mizo officer-te hian ṭhelrêt an hnài dan te, a hnái an lak khawm dante leh an sâwngbàwl zui dante a hmunah an en bawk.

LRSWC Team of Officers-te hi vawiinah Mizoram an rawn haw dawn a ni.