MNF ṭhalai hruaitute'n hnathawh an enfiah
Mizo National Youth Front (MNYF) hruaitute chuan an president Robert Romawia Royte, MLA hoin nimin khan Tripura aṭanga Aizawl thlenga gas pipe Hachhek biala phûm ṭan tawhte leh Mamit Luangpawl leh Kawrthaha Residential Sports School sak mek an tlawh.
MNYF hruaitute chuan MNF sorkar laia bul ṭan, Kawrthah khuaa cheng nuai 3,286.38 sénga siam mek Residential Sports School an tlawh. Football khelmualah phûllem phah zawh tawh niin, volleyball court leh basketball court siam mek a nih thu te, multipurpose hall sak zawh tawh a nih thu te, hostel pahnih, academic building, zirtirtu quarters leh principal quarters-te 87% zawh a nih tawh thute an tarlang.
Cheng nuai 3,200 senna tur Mamit Luangpawla Residential Sports School sak mekah multipurpose hall sak zawh tawh a nih thu te, football khelmuala phùllem phah, basketball court leh volleyball court-te chu June 2024-ah zawh tum a nih thu te, in dang panga chu 85% zawh a nih tawh thute an tarlang bawk.
Mamit Mangkhawng-daia community centre building, basketball court, tennis court, futsal ground leh Mamit Multipurpose Indoor Stadium sak mekte pawh MNYF hruaitute chuan an tlawh a ni.
MNYF hruaitute chuan, MNF sorkar laia bul ṭante ZPM sorkar tharin ṭha taka an chhunzawm chu lawmawm an tih thu an sawi a, "Department tinin sorkar hmasa hnathawhte ṭha takin chhunzawm vek se chuan sum lapse leh a kaihhnawih harsatnate a thleng lo tur a ni a, sorkar hmasa hnathawhte chhunzawm ṭha duh lote chu an mualpho fo a ni," an ti.