MPYCC-in Home Minister an ngen

Mizoram Youth Pradesh Congress Committee (MPYCC) hruaitute chuan nimin khan Home minister K Sapdanga a pisaah an hmu a; kumtlinglo ram páwna hna thawk tura thawn chhuah chungchanga harsatna chingfel a, hma la tur turin an ngen.

MPYCC hruaitute chuan Home Minister hnenah hian ngenna lehkha an thehlut a; ram páwna kumtling lo thawn chhuah chungchang chu Chief Minister hnenah an thlen tawh thu tarlangin, "Thla khat dawn a liam hnuah pawh hmalakna mumal a awm loh bakah, thil dik lo titute hremna mumal tak a awm loa hriat a ni. CM-in dan leh thupek a ngaih pawimawh lohzia te, a enkawl mipui himna a ngaih pawimawh lohzia leh thil tak tak ti tlâk a nih lohzia a tichiang hlein kan hria," an ti.

Congress ṭhalai hruaitute chuan, Home Minister a nih ang leh Chief Minister aia harsatna chingfel rang thei zawk tura an ngaih avanga hma la tura ngen an nih thu K Sapdanga an hrilh a ni.