KHAWTHLIR

VC-in lirthei hlân

Kolasib Venglai VC chuan May 21, Thawhlehni zan khan YMA, Kolasib Venglai Branch hnenah a ṭula hman turin mini truck an pe. Lirthei hlanna inkhawm hi YMA Park-ah nei a ni a, Kolasib Venglai YMA president H Vanlalnghaka'n a kaihruai. Kolasib Venglai VC president HP Lalfamkima chuan, YMA chu kawng engkima khawtlang tana che chhuak an nih angin, an harsatna leh mamawh nia an hriat mini truck an pek thu a sawi.

MLA-in enfiah

Dampa bialtu MLA Lalrintluanga Sailo chuan nimin khan SLT Infracon-in Dampa bial chhunga West Phaileng leh Marpara kawng an siam a enfiah. MNF thuchhuah tarlan danin, kawng hi June 2023-ah siam ṭan a ni a; Lalrintluanga Sailo chuan, hna thawh tawhte chu ṭha tawka a hriat thu sawiin, "An thawh chinah sawisel tur a váng hle," a ti. MLA hian Dampa biala Pûkzíng leh Silsuri kawng siam tur leh, Hruiduk leh Silsuri khuaa hmunphiah kudam siam turte a en bawk.

Tanpuina hlan

Governor Dr Hari Babu Kambhampati chuan Khawzawla Chhanchhuahna Home tan Financial Assistance to Orphanage/Home hnuaiah ṭanpuina Rs 23,300 a pe a; Larsap aiawhin Khawzawl bawrhsap K Lalrohlua'n nimin khan Chhanchhuahna Home enkawltute hnenah a hlan. Chhanchhuahna Home hi November 2020-ah kalpui ṭan a ni a, thawktu pariatin mi 30 vel an enkawl a ni.

MEFCOS leh CM

Mizoram Environment & Forest Consultative Forum (MEFCOF) hruaitute chuan nimin khan chief minister Lalduhoma chu a pisaah an kâwm a, an mamawhte leh rawtnate an thlen. Chief Minister chuan, MEFCOF ruahmannate a hlawhtlin theih nan sorkarin thawhpui zel a tum thu sawiin, an ruahmannate ziaka thlen turin a lo hrilh.

Lemchan zirhona

Information & Public Relation department leh Mizoram Film Forum (MFF) chuan lemchan chungchang zirna, Acting Training nimin khan IPR Auditorium-ah an buatsaih ṭan a, MFF advisor leh patron Lalsawmliana Pachuau-in a hmanpui. Training hi ni nga awh tur a ni a, lemchan lama tui mi 31 an tel a ni.