NGO-in rêl kawngah rawtna la thlen lo; Sihhmui thleng kaltir duhtâwk an tam
NGO Coordination Committee (Joint NGO) chuan Sairang aṭanga Hmawngbuchhuah thlenga rêl kawng kaltir chungchanga an ngaihdan Mizoram sorkarah an la thlen lo. Rél kawng chungchanga Joint NGO-in a ràwn hrang hrang zingah Sihhmui thlenga rél kaltir duhtâwk an tam.
Vanglaini palai zawhna chhangin Joint NGO hruaitute chuan, May 10, 2024-a inràwnkhawm an buatsaih hnuah ràwn tur àwm hrang hrang an ràwn thu an sawi a, "Ngaihdan hrang hrang kan la khawm a, chuta ṭang chuan hrual mûmin, Hmawngbuchhuah thlenga rél kawng kaltir ṭha kan tih leh tih loh sorkarah kan thlen ang," an ti.
Joint NGO hruaitute sawi danin, May 10, 2024-a inràwnkhawm an buatsaiha kal khawmte zingah Lawngtlai district-a Hmawngbuchhuah thlenga rél kawng kaltir ṭul ti lo leh Sihhmui thleng kaltir ṭha tâwka ngai an tam zawk.
Tarlan tawh angin, inràwnkhawmnaah hian Joint NGO-a tel pawl - Central YMA, MUP, MHIP, MZP leh MSU aiawh te, political party - BJP, MPCC, PC, ZPM leh ZNP aiawh te, Mizoram Environmental NGO Coordination Committee, Centre for Environment & Social Justice (CESJ), Mizoram Merchant Association (MIMA) leh a kaihhnawih sorkar department aiawhte leh economist-te an tel a ni.
Jointg NGO chairman Lalhmachhuana, CYMA president chuan, inrawnkhawm an huaihawt chhan sawiin, "Sairang aṭanga Hmawngbuchhuah inkar rél kawng chungchanga RTI Act hmanga kan zawhna CMO-in an chhàn danin, sorkarin mipui ngaihdan lain, mipui ngaihdanin a kal ang tih a ni a, mipui ai awh zo tura kan ngaihte sàwm an ni," a ti.
Sairang leh Hmawngbuchhuah inkar rél kawng siam tumah preliminary survey tih a ni tawh. Survey hmasa ang chuan, rél kawng chu km. 223-a thui tur a ni a, lei (bridge) 110 leh leiverh (tunnel) 64, km. 98.63-a thui awm tura chhût a ni. Rél chawlhhmun (station) 16 a awm ang a, rêl chu darkar khata km. 100-a chaka tlân thei tura ruahman a ni.
Rél kawng chungchangah hian final survey la tih tur a ni a, rel kawng siamna tur sum leh survey titu tur tihfel a ni tawh.