Mizorama heroin man zingah state páwna hralh tur a tam

Excise & Narcotics department (END) hotute chuan, Mizorama heroin (no.4) man zingah state páwna hralh tur a tam thu sawiin, "Kan man zinga a tam zawk daih hi state páwna hralh tur a ni," an ti.

Vanglaini palai zawhna chhangin END hotute chuan, Mizoram chu Myanmar aṭanga ruihhlo tawlh rûkna kalkawng a nih avangin ruihhlo man tur a tam thu an sawi a, "Heroin kan man tam zawk hi state páwna an hralh tur a ni a, a hlâwm lian kan mante phei chu state páwna hralh tur vek a ni," tiin, Meghalaya leh Assam hmun ṭhenkhatah heroin ti an tam thu an sawi.

Excise department hotute chuan, hnam dangin heroin an tawlh nasat thu sawiin, "An state chhungah mamawhna a san avangin risk an la nasa. Mizoram kaltlangin an state chhunga hralh turin lak luh an tum ṭhin," an ti.

Myanmar buaina vanga Mizorama rawn ráltlân an tam hnuah Mizoramah heroin a hluar lehzual thu sawiin END hotute chuan, "Ráltlânte hian sum lak luhna an neih mumal loh avangin heroin hmanga lak luh tumin theihtawp an chhuah," an ti a; heroin an man neitu/kawltu zingah Myanmar aṭanga rawn ráltlân nia insawi an tam thu an sawi.

Excise & Narcotics department hotute sawi danin, Mizoramah heroin man (rate) a danglam deuh reng a, a tlàwm cháng leh a to deuh cháng a awm; a tlangpuiin tun hma ai chuan a tláwm. Heroin an man tamin a rate a pung ṭhin a ni.