MZP-in HSLC top 10-a Mizote an chawimawi

Mizo Zirlai Pawl (MZP) General Headquarters, Aizawl chuan nimin khan Vanapa Hall-ah High School Leaving Certificate (HSLC) Examination 2024-a top 10-a Mizo langte chawimawina hun an buatsaih a; minister of state Prof. Lalnilawma'n a hmanpui.

HSLC 2024 top 10-ah zirlai 14 an lang a, chu'ng zinga 13 chu Mizo an ni. Top 10-a lang Mizote chu chawimawina thuchei, Rs 5,000 leh lehkhabu pahnih ṭheuh hlan an ni.

Minister Prof. Lalnilawma chuan, HSLC pass tharte'n hmabak thui tak an la nei tih sawiin, "Nun in hmang chho a, theihtawp in chhuah a, tunah pawl 10 in pass chhuak a, tun hi hlawhtlinna kailàwn pakhat zawh chhuahna, a bul ṭanna chauh a ni," a ti.

Hlawhchhama awm dan zir a ngai ṭhin tih sawiin Lalnilawma chuan, "Hlawhtling zar zarte hian an thiam loh chu hlawhchhama awm dan a ni a, an nunin a tawrh phah an awm fo. Hlawhtlinna hi hlawhchhamna aṭanga pên khat lekah a awm a, amaherawhchu, hlawhchhamnaah in awm reng chuan in hlawhtling ngai lo ang," a ti a; zirlaite chu an kal zelnaah hlawhchham cháng an la nei thei tih sawiin, hlawhchhama awm dan thiam tum turin a chah.

Minister chuan, zirlaite chu an thiamna leh finna te, an hlawhtlinnate anmahni tan chauh ni lo, ram leh hnam leh khawtlang tan hmang turin a chah a, "Kan zir zelnaah khawi hmunah pawh awm ila, Mizo identity - tlawmngaihna leh huaisenna, mi dang tana inpekna i vawng nung zel ang u," a ti.

MZP president H Lalthianghlima pawhin thu sawiin, Mizo zirlaite inkarah inelna thianghlim awm se an duh thu a sawi a; eng hna pawh thawk thei tura inbuatsaih a ṭul thu a sawi bawk.