Ráltlân an rawn luh belh zel

Myanmar rama Chin state hmar lam, Tonzang leh Cikha khuaa Myanmar sipai hmunte Chin National Army (CNA) leh an thawhpui PDF pawl hrang hrangin an lak hnuah indona kal zel avangin Mizoramah ráltlân an luh belh zel.

Myanmar tualchhung indona avang hian May 21, Thawhlehni aṭang khan Mizoramah ráltlân an rawn lut thar leh a, mi 55 vel an rawn lut tawh. Hakha, Khawmawi, Falam, Tedim, Tahan, Tuingo leh Khampat aṭanga lo lut an ni hlawm a, Zokhawtharah an la khawsa rih. Mi pahnih erawh chu Mimbung, Saitual district-ah an awm thung.

Chin state hmar lam khaw eng emaw zata Myanmar sipai camp lak a nih hnu hian Myanmar sipaite'n indo thlawhna hmangin an bei zui a, bomb eng emaw zat an thlâk tawh. Tonzang leh Cikha khua bakah, Lungtak leh Phaitu-ah pawh bomb an thlâk nasa a, bomb puak vangin biak-in tiamin in 40 chuang a chhia a ni.

Tonzan vela bomb thlak a nih avangin Khawmawi leh Rihkhawdar mite chu an rálkhêl a, May 22, Nilaini chawhma khan Zokhawtharah mi tam tak an tlânchhe lut a, chawhnu lamah an kîr leh nghal vek thung.