Kuminah Mizoram pumah ASF vangin vawk 1,922 thi tawh, 2,630 suat tawh

Vawk pùl hri, African Swine Fever (ASF) vangin kumin January 1 aṭanga nimin thleng khan Mizoramah khua/veng 54-ah vawk 2,276 a thi tawh a, hri vanga thi 1,922 leh suat 2,630 a ni. Aizawl district-ah ASF vanga vawk thi leh suat 1,517 a awm tawh.

AH&Vety department-in January 1 aṭanga nimin thlenga Mizorama ASF vangin khua/veng 54-ah vawk 1,922 a thi tawh a, khua/veng 31-ah ASF darh zel tur vên Vety hotute hriatpuinain vawk 2,630 suat tawh a ni.

Kumina ASF hri darh nasat berna Aizawl district-ah nimin thleng khan khua/veng 42-ah vawk 546 a thi tawh a, vawk 971 suat tawh a ni a, ASF kaihhnawiha vawk thi leh suat chu 1,517 a tling. Aizawl district-a vawk hri lênna hmun (khua/veng) 42 zinga 28 chu Aizawl Municipal Corporation chhung a ni.

Aizawl district-a Tuirial khuaah ASF vanga vawk thi 28 leh suat 459 a awm tawh a; Mizoram puma ASF kaihhnawiha vawk thi tamna ber khua a ni mek. Tuirial dawtah hian Khawzawl district-a Dulte khuaah vawk thi leh suat 175 a awm tawh.

Mizoram puma ASF vanga kumina vawk thi leh suat aṭanga chhûtin, Aizawl district-in a tuar na ber. Mizoram puma ASF vanga vawk thi 1,922 zinga 28.40% chu Aizawl district-a mi a ni a, vawk suat zawng zawng 2,630 zinga 36.92% pawh Aizawl district-a mi a ni. Aizawl district-a vawk thi leh suat zawng zawng chu Mizoram puma vawk thi leh suat aṭangin 66.65% a tling.

AH&Vety department hriatpuia vawk suat neitute tan Mizoram sorkar chuan sorkar laipuiah zangnadawmna a dilsak ṭhin a, ASF vanga vawk thi neitute erawh chu zangnadawmna pek an ni lo.