Biological Diversity Day pualin hun hmang
Mizoram State Biodiversity Board chuan May 22, Nilaini khan Forest Training School, Bethlehem Vengthlangah International Day for Biological Diversity an hmang a, Day puala Mizoram University post graduate zirlaite tana essay inziahsiak lawmman sem a ni.
International Day for Biological Diversity-ah hian khuallian AK Biswal, Mizoram PCCF chuan, ram neitute leh a chhunga chengte'n biodiversity humhalhnaah tih tur leh mawhphurhna an neihte a sawi a; nasa zawka ṭan la turin mipui a sáwm.
AK Biswal chuan, ramngaw leh a chhunga awmte humhalhna lama hma la turin khaw tinah Biodiversity Management Committee a ding nia sawiin, hmasawnna daih rei leh rintlak nei turin theihtawpa ṭan la turin a chah a, "Danin a phût angin kan chanvo leh mawhphurhnate hlen chhuak ṭheuh turin kan ṭan rual a pawimawh," a ti.
Day hmannaah hian Mizoram State Biodiversity Board hotu te, Biodiversity Management Committee member te, EFCC department-a thawk te, environment humhalh lam buaipuitu pawl aiawhte leh Bethlehem Vengthlang Middle School zirlaite an tel.
International Biological Diversity Day 2024 pualin May 10, 2024 khan Essay Writing Competition buatsaih a ni a, chuta ti ṭhate hnenah chuan lawmman hlan a ni.
Biodiversity Day pual hian nimin khan Biodiversity Management Committee member-te intihchak tawnna atan Reiek leh Sailamah 'Empowerment and strengthening exposure visit' buatysaih a ni a, vawiinah pawh chhunzawm a ni ang.
Nungchate humhalha venhim a nih theih nan kum 1992-a Brazil khawpui Rio de Janeiro-a Earth Summit-ah United Nations Convention on Biological Diversity din a ni. Convention-ah hian May 22-ah ram 196-in agreement an ziak a, chu'ng zingah chuan India pawh a tel.
Ram 196-in agreement an ziah ni, May 22 chu International Day for Biological Diversity atan United Nations-in a puang a; kum tin thupui thlan ṭhin a ni a, kumina thupui chu 'Be part of the plan' tih a ni.