Green Mizoram Day 2023 puala Lungleia thing phun 96% a nung

Lunglei district forest officer Lalduhthlana tarlan danin, nikum 2023 khan Green Mizoram Day pualin Lunglei leh Mausen inkarah thing ṭiak 395 phun a ni a, chu'ng zinga 380 (96%) chu a dam khawchhuak.

Lunglei District Level Committee on Green Mizoram ṭhutkhawma DFO Lalduhthlana sawi dan chuan, kum 1999-a Green Mizoram Day hman ṭan aṭanga nikum thleng khan Lunglei Forest Division chuan thing ṭiak 5,74,920 a sem chhuak tawh a, Green Mizoram Day pualin thing ṭiak 13,521 phun tawh a ni.

Lunglei bawrhsap Ramdinliani hoa Lunglei district-a Green Mizoram Day 2024 hman dan tur sawihonaah hian Green Mizoram Day chu Theiriata TNT hmunah hman an rêl. Kumina Green Mizoram Day thupui chu 'I nunna atan thing phun rawh' (Plant trees for life) tih a ni.